دترکيې EHHمؤسسه افغانستان ته ۱۰۰مټريک ټنه اصلاح شوي تخمونو مرسته وکړه

۱۸/صفر/۱۴۴۳هـ.ق
۳/تله/۱۴۰۰هـ.ش
د ا.ا.ا دکرنې، اوبولګولو او مالدارۍ وزارت چارسمبال مولوی عبدالرحمن راشد او د ياد وزارت مرستيال مولوی صدراعظم، په افغانستان کې د ترکيې EHHمؤسسې مسؤول سره وکتل.
په دې کتنه کې دواړو خواوو پر دوه اړخيزو همکاريو ژمنه وکړه.
دکرنې وزارت سرپرست الحاج مولوی عبدالرحمن راشد،
د يادې مؤسسې چارواکو ته د هر راز همکاريو او امنيت ډاډ ورکړ او زياته يې کړه: «د ترکيې هېواد زموږ دوست هېواد دی او هر ډول همکارۍ چې اړتياوي ترسره کوو يې او ددې مؤسسې د پروژو د پلي کېدو په موخه د بشپړ امنيت ډاډ ورکوو.»
په دې ناسته کې د ترکيې د EHHمؤسسې مسؤول وويل،  چې د افغانستان بزګرانو لپاره ۱۰۰مټريک ټنه اصلاح شوي تخمونه مرسته کوي او په راتلونکې کې به هم هڅه وکړي چې دکرنې وزارت سره لا ډېرې همکارۍ ولري.
هغه زياته کړه،  چې ياده مؤسسه د افغانستان بزګرانو سره د مرستې په پار ښې برنامې لري او په پام کې لري،  چې په راتلونکې کې يوشمېر بزګرانو ته برمه يې څاګانې حفر کړي تر څو د دوی د ځمکو خړوبولو ته زمينه برابره شي.
بايد وويل شي،  چې تر دې وړاندې د کرنې وزارت له خوا هرکال د کرکېلې په موسم کې پر بزګرانو اصلاح شوي تخمونه وېشل کېدل او ټاکل شوې،  چې سږکال به هم دا لړۍ تر راتلونکې يوې مياشتې پيل شي