د خوست ولایت کرنې رییس د یاد ریاست مرکزي بڼ څخه لیدنه وکړه
د خوست ولایت کرنې، اوبو لګولو او مالدارۍ رئیس الحاج مولوي شیر محمد ذبیح د کرنې ریاست متخصص او سلاکار بهیرګل صابري او د کرنیزو چارو آمر مولوي اسلم خان منیب په ملتیا د یاد ریاست له مرکزي بڼ څخه لیدنه وکړه.
د لیدنې پر مهال د نویو جوړو شویو قوریو، بڼونو، څېړنیزو پلاټونو او د طبیعي سرچینو اړوند فعالیتونو ارزونه وشوه. نوموړي د بڼ نقشې تنظیم او د نویو میوه لرونکو او زینتي ونو او بوټو د قوریو جوړولو په برخه کې اړوندو آمریتونو ته لازمې سپارښتنې وکړې.
هغه ټینګار وکړ چې د خوست ولایت د سمسورتیا او زرغون چاپېریال لپاره دې اړین تدابیر ونیول شي او د راتلونکو اقلیمي بدلونونو له احتمالي ناوړه اغېزو د مخنیوي په موخه دې لازم اقدامات ترسره شي.
