د کرنې وزارت د بشري سرچینو رییس په لغمان کې د الکترونیکي حاضري سیستم پرانیسته وکړه
۱۲ لړم ۱۴۰۳ه.ش
۳۰ رَبِیعُ الْثاني ۱۴۴۶ه.ق
د کرنې، اوبولګولو او مالدارۍ وزارت د بشري سرچینو رییس الحاج مولوي محمد عثمان ترابي لغمان ولایت ته د سفر پر مهال د کرنې ریاست کارمندانو ته د الکترونیکي حاضري سیستم پرانیسته وکړه او د کارکوونکو سره یې پر مهمو موضوعاتو خبرې اترې وکړې.
د کرنې وزارت د بشري سرچینو رییس الحاج مولوي محمد عثمان ترابي د لغمان ولایت د کرنې ریاست کارکوونکو سره په کتنه کې وویل، چې د ادارې د شفافیت او کنترول په موخه یې د الکترونیکي حاضري سیستم فعاله کړه، ترڅو په دې ادره کې روڼتیا رامنځته او د کارونو د خنډ او ځنډ مخه ونیول شي.
د بشري سرچینو رییسمولوي محمد عثمان ترابي کارکوونکو ته د دندو په اجرا کې د ژمنتیا سپارښتنه وکړه، زیاته یې کړه چې د هېواد پرمختګ کرنې او مالدارۍ پورې تړلی دی او دې برخې ته ژمن پرسونل ته اړتیا ده. هغه پر کارمندانو غږ وکړ چې په دندو کې له عدالته کار واخلي او د امر اطاعت وکړي.
د ناستې په جریان کې د لغمان د کرنې رییس مولوي عبدالستار محمد راغلي پلاوي ته د ښه راغلاست ویلو ترڅنګ د دوی له خوا د الکترونیکي حاضري د سیستم د فعالولو څخه مننه وکړه. هغه زیاته کړه چې دغه ګام به د کارمندانو د حاضري کنترول کې اغېزناک وي.
همدارنګه، آزاد بحث هم ترسره شو، او د لغمان دکرنې ریاست کارکوونکو د ظرفیت لوړونې، د پرسونل کمبود، او کلنۍ ارزونې په برخو کې خپلې غوښتنې او ستونزې له پلاوي سره شریکې کړې. راغلي پلاوي د دغو ستونزو د حل ډاډ ورکړ.
