د ننګرهار مومندره کې لسګونو بزګرانو سره مرسته وشوه
۱ لیندۍ ۱۴۰۲ه.ش
۹جُمَادَى الأول ۱۴۴۵ ه.ق
د ننګرهار دکرنې، اوبولګولو او مالدارۍ ریاست ددې ولایت په مومندرې ولسوالی کې د ماشوم ساتنې مؤسسې له لوري پر بزګرانو کيمياوي سرې، د غنمو اصلاح شوی تخمونه او کرنیزې توکي وېشلي دي.
د ننګرهار د کرنې، اوبولګولو او مالدارۍ رییس مولوي عبدالستار محمد وویل په مومندرې کې پر ۱۵۵ بزګرانو د غنمو اصلاح شوي تخمونه، کیمیاوي سرې او کرنیز وسایل وېشل شوي دي.
محمد وايي، چې هر بزګر ته ۵۰ کيلو توره او ۵۰ کيلو سپينه سره او ۲۵ کيلو د غنمو اصلاح شوی تخم ورکړل شوي دي.
دغه راز د ننګرهار دکرنې رییس مولوی عبدالستار محمد وویل، چې د ماشوم ساتنې مؤسسه یادو بزګرانو ته لس قلمه د بزګرۍ توکې چې د درمل شېندلو پمپ، لاسي کراچۍ، بیلچه، پنجه کش، ښاخۍ، سطل، د درمل شېندلو جامې، دستکش، موزې،لور او رمبې شامل دي هم ورکړل شوي دي.
ددې مرستې موخه په یاده ولسوالی کې د بېوزلۍ سره مبارزه او د خوړو خوندیتوب رامنځته کول دي، ترڅو کورنۍ پر ځان بسېا شي.
باید وویل شي، چې د ماشوم ساتنې مؤسسه وړاندې تردې هم په مومندرې ولسوالی کې سلګونه بزګرانو سره د اصلاح شوي تخمونو، کیمیاوي سرو او کرنیزو وسایلو مرسته کړې وه.
