د غنمو واردات او د ژرندو فعالیت په پار ګډه غونډه په لاره واچول شوه
۹ زمری ۱۴۰۰
د غنمو واردات او د کورنیو ژرندو د فعالیتونو په پار د کرنې وازرت، د سوداګرۍ او صنعت وزارت، د ژرندولرونکو ټولنې او د کانونو او صنایعو وازرت ترمنځ ګډه غونډه دکرنې په وزارت کې په لاره واچول شوه.
په دې غونډه کې، دکرنې وزارت د اوبولګولو او طبیعي سرچینو مرستیال حشمت الله غفوي، د افغانستان د کانونو او صنایعو خونې اجرایي رییس رحیم الله سمندر، د سوداګرۍ او صنعت وزارت د خفیفه صنایعو رییس رشاد باختري او ددې وزارت د لومړنیو صنایعو رییس مجیبالله ضیاء، د مالیې وزارت د عمومي عوایدو ریاست مرستیال احمدولي نوري، د افغانستان د ژرنده لرونکو ټولنې رییس محمدهاشم غزنيوال او د کرنې وزارت یوشمېر رییسانو او سلاکارانو حضور درلود.
په یاده غونډه کې د غنمو پر وارداتو، د کورنیو ژرندو ستونزو او فعالیتونو، مالیات، د اوړو او غنمو پېرل او د خصوصي سکټور له خوا د غنمو د اوړو کولو په پار د برېښنا پر چمتو کولو خبرې وشوې. سربېره پر دې، د جمهوري ریاست د سپارښتنې پر اساس، په خصوصي او دولتي سیلوګانو کې د اوړو او غنمو پر زېرمه کولو هم خبرې وشوې ترڅو په هیڅ وجه بازار د غنمو او اوړو له کمښت سره مخ نه شي.
بلخوا په دې غونډه کې ټینګار وشو، چې حکومت، صنعت کاران او سوداګر خلکو ته د لومړنیو موادو په ځانګړې توګه د غنمو او اوړو عرضه کولو ته ژمند دي.
