دایکندي کې د مڼو د سړوخونو لرونکي له خپلو سړو خونو راضي دي

۱۴ کب ۱۳۹۹
د دایکندي ولایت د کرنې، اوبولګولو او مالدارۍ رییس سید عبدالواحد فیروزي، ددې ولایت د مڼو له درې سړو خونو څخه تر نظارت وروسته وایي، چې د مڼو د سړوخونو خاوندان له خپلو سړو خونو خوښ او راضي دي.
ښاغلي فیروزي د یادو سړوخونو د مالکانو په حواله وایي، کومې مڼې چې په دغو سړوخونو کې ساتل شوي دي، په بشپړ ډول روغ پاتې دي او له کوم وخت څخه چې سړوخونوته راوړل شوي دي په یادو محصولاتو کې تر دې دمه هیڅ ډول بدلون نه دي رامنځته شوي.
د دایکندي د کرنې رییس زیاته کړه: «د سړو خونو خاوندان زیاته کړه، چې سړې خونې په دې ولایت کې ښې پایلې ورکړي دي او د کرنې وزارت د مشرتاله له پاملرنې څخه یې مننه وکړه.»
د یادونې وړ ده، چې دایکندي د سړو ولایتونو په ډله کې ده او د مڼو د حاصل ټولولو په وخت یو من مڼه په ۷۰ افغانۍ خرڅېږي خو اوس همدا مڼه چې په سړو خونو کې ساتل شوي دي په بازار کې من په ۲۰۰ افغانۍ خرڅېږي. د هرې ورځې په تېرېدو سره ددې محصول بیه زیاتېږي.
دغه راز بڼوال په راتلونکي کلونو کې د نورو سړوخونو د جوړېدو غوښتونکي دي.