ازبکستاني پلاوی کابل ته ورسید
۹ لیندۍ ۱۴۰۴ هـ.ش
۹ جُمَادَى الثاني ۱۴۴۷ هـ.ق
د ازبکستان له هېواده د دولتي استازو او خصوصي سکتور له غړو څخه جوړ پلاوی، چې د دغه هېواد د کرنې وزارت مرستیال یې مشري کوله، کابل ته راورسېد. دغه پلاوی د کابل په هوايي ډګر کې د کرنې، اوبو لګولو او مالدارۍ وزارت د مالدارۍ او د حیواني روغتیا عمومي رییس مفتي ذاکرالله ذاکر له لوري هرکلی وشو.
د معلوماتو له مخې، ټاکل شوې ده چې د ازبکستان پلاوی د افغانستان د کرنې وزارت له مسوولینو او د خصوصي سکتور له استازو سره د همکاریو د پراختیا، د تجربو د تبادلې او د کرنې او مالدارۍ په برخو کې د ګډو فرصتونو په اړه خبرې اترې وکړي.
د دې سفر موخه د تخنیکي همکاریو د زمینو ارزونه، د کرنیزو راکړو ورکړو زیاتوالی او د دواړو هېوادونو ترمنځ د تعاملاتو پیاوړتیا ښودل شوې ده.
