ننګرهار ته دکرنې وزیر سفر او دهېواد د ځنګلونو په ساتنه او بیارغونه یې ټینګا
۱۱ لړم ۱۴۰۴ هـ.ش
۱۱ جُمَادَى الأول ۱۴۴۷ هـ.ق
د افغانستان اسلامي امارت د کرنې، اوبولګولو او مالدارۍ وزير مولوي عطاءالله عمري، د يوې لوړپوړې پلاوي په مشرۍ ننګرهار ولايت ته دخپل سفر په ترڅ کې د ختيځو ولايتونو د خلکو او سيمهييزو چارواکو په ګډون يو ستر ولسي غونډه کې برخه واخيسته.
ددې سفر پر مهال دکرنې وزارت د اوبولګولو او قدرتی سرچینو مرستیال مولوي باز محمد فيضان، د کورنيو چارو وزارت مرستیال مولوي محمد نبي عمري، او د کرنې وزارت يو شمېر رييسان او سلاکاران د وزير ملګرتيا کوله.
د غونډې پر مهال د کرنې، اوبولګولو او مالدارۍ وزير د هېواد د ځنګلونو د ساتنې او بيارغونې پر اهميت ټينګار وکړ او ويې ويل: «موږ هڅه کوو چې د هېواد د ځنګلونو د ساتنې او بیارغونې لپاره له ټولو موجودو امکاناتو څخه ګټه واخلو».
همدارنګه دکرنې وزارت د اوبولګولو او قدرتی سرچینو مرستیال مولوي باز محمد فيضان، د کورنيو چارو وزارت مرستیال مولوي محمد نبي عمري، د ننګرهار والي او مرستيال والي په جلا جلا ويناوو کې د ځنګلونو پر ارزښت او د ګډو هڅو پر اړتيا ټينګار وکړ، څو د ونو د پرېکولو او د لرګيو د قاچاق مخه ونيول شي او د هېواد طبيعي ځنګلونه بېرته ورغول شي.
په دې غونډه کې د ختيځو ولايتونو يو شمېر علماوو او قومي مخورو د خپلو سيمو د خلکو په استازيتوب د کرنې وزارت د هغو پروګرامونو ملاتړ وکړ، چې د ځنګلونو د ساتنې او بیارغونې په موخه پلي کېږي. هغوی غوښتنه وکړه، چې د لرګيو پر ځای د بديلو منابعو لکه ګاز، برېښنا او ډبرو سکرو زمينه برابره شي، څو د خلکو اړتياوې له ځنګلونو څخه پرې شي. دوی همدارنګه له اسلامي امارت څخه وغوښتل، چې د ځنګلي سيمو اوسېدونکو ته د کار زمينه برابره کړي، څو د هغوی ژوند د ځنګلي منابعو له اتکا پرته دوام ومومي.
په پايله کې پرېکړه وشوه، چې د ځنګلونو د اغېزمنې ساتنې لپاره به ځانګړي ځنګلساتونکي او مامورين په ځنګلي سيمو کې ګومارل کېږي، محلي شوراګانې او ولسي ټولنې به پياوړې کېږي او د ځنګلونو د بيا رغونې بهير به په منظم او دوامدار ډول پر مخ يوړل شي.
افغانستان په تېر کلونو کې د ځنګلونو د پرېکولو او قاچاق له جدي ستونزو سره مخ و. د افغانستان اسلامي امارت د کرنې، اوبولګولو او مالدارۍ وزارت د ونو د ناقانونه پرېکولو د مخنيوي، دزرغون پوښښ د زياتوالي او د ځنګلونو د بيا رغونې لپاره پراخ پروګرامونه پيل کړي، څو د هېواد طبيعي شتمنۍ وساتل شي او د چاپېريال توازن بېرته ټينګ شي.
