د کرنې د ودې د ملي کنفرانس دویمه ورځ: د اسټراټژي بشپړولو په پار ګروپي کارونه

۴ لیندۍ ۱۳۹۸
د کرنې د ودې د ملي کنفرانس دویمه ورځ د بزګرانو، د کرنې د برخې کارپوهانو او د پوهنتون د استادانو خبرې اترې او سلا مشورې ته ځانګړی شوې، چې په بېلابېلو ګروپونو کې پر تولیدي عواملو، بسته بندی، بازارته د توکو رسولو څرنګوالي، او پر شته فرصتونه او ننګونې خبرې اترې او سلا مشورې وشي.
ددې ملي کنفرانس د دویمې ورځې په پیل کې د کرنې وزارت د اوبولګولو او طبیعي سرچینو مرستیال حشمت الله غفوري ګډونوالو ته وویل: «هیله ده، چې په لسو ګروپونوکې سره تنظیم شئ او پر تولیدي عواملو، د تولید زیاتوالی د بېلګې په توګه غلې دانې، مېوې، لبنیات، سابه او دغه راز د ځنګلونو ساتنه، د ستونزو هوارول، له شته فرصتونو څخه ګټه پوته کول او په کلیو ا بانډو کې پر کرنه خبرې اترې وکړئ.»
ښاغلی غفوري دغه راز له ګډونوالو وغوښت چې د خصوصي سکټور او حکومتي ادارو پر مسولیتونو خبرې وکړي او د هر ټیم په استازي توب یو کس دې د خپل ټول ټیم نظرونه او وړاندیزونه ګډونوالو ته وړاندې کړي ترڅو د دغو نظرونو په اډانه کې د کرنې سکټور فعالیتونه حرکت او دکرنې اسټراټژي جوړه شي.
«په سیمو کې پر کموالي، ارزښت لوړول، د توکو ټولول، بسته بندی او پاک کاري، پروسس، مارکېټ ته رسول، درجه بندی، صادرات او بازار موندنه خبرې وکړئ، په هر یوه کاري ټیم کې د هېواد له بېلابېلو زونونو څخه د کرنیزو چارو کارپوهان له تاسو سره دي او دوی په دې برخه کې له تاسو سره مرسته کوي.»
د کرنې وزارت د اوبولګولو مرستیال وویل، چې د نظرونو او وړاندیزونو له ټولولو وروسته یو بشپړ پایلې ته رسیږو تر څو دا ځنځیر بشپړ شي.