د لوګر محمدآغې کې پر یوشمېر بزګرانو د غنمو اصلاح شوي تخمونه، کیمیاوي سره او نغدې مرستې ووېشل شوې

د لوګر ولایت د کرنې، اوبولګولو او مالدارۍ ریاست چارواکي وایي، چې د اهل خیر په نوم د یو عربي خیریه بنسټ له خوا  د محمدآغې ولسوالۍ اړوند پر ١٠٠ بزګرانو د غنمو اصلاح شوي تخمونه، کیمیاوي سره او نغدې مرستې ووېشل شوې.
د لوګر دکرنې رییس مولوي عبدالرؤف سعید د یاد خیریه بنسټ له مسؤلینو څخه د مننې ترڅنګ وویل؛ چې په دغه مرسته کې هر بزګر ته ١٠٠ کیلو د غنمو اصلاح شوی تخم، ۲٠٠ کیلو سپینه سره، ۱٠٠ کیلو توره سره او شپږ زره نقدې پیسې ووېشل شوې.
دغه راز د لوګر د کرنې او مالدارۍ رییس د اهل خیر عربي بنسټ له مسؤلینو څخه نورو ولسوالیو ته د ورته مرستو په نظر کې نیولو سربېره له بزګرانو غوښتنه وکړه، چې له ترلاسه کړي اصلاح شوي تخم او کیمیاوي سرو څخه په بشپړه توګه ګټه پورته کړي.
دغه راز د محمدآغې ولسوالۍ مرستیال مولوي حماس د کرنې او مالدارۍ ریاست او اهل خیر بنسټ څخه مننه وکړه او ورته مرستې یې د بزګرانو پرځان بسیاینې برخه کې خورا اغیزناکې یادې کړې.
ورته مهال د اهل خیر عربي بنسټ استازۍ مفتي فضل الرحمن اخندزاده له وېشل شوي مرستې څخه موخه د بزګرانو اقتصاد ته وده او د غنمو په حاصلاتو کې زیاتوالې وبللې او ډاډ یې ورکړ، چې د دې مرستو لړۍ به نورو ولسوالیو ته وغځوي.
د یادونې وړ ده، چې تېر کال هم د یاد بنسټ له خوا لوګر ولایت مرکز ته اړوند په لسګونو بزګرانو باندې ورته مرسته وېشل شوې وه.
هېره دې نه وي، چې سږ کال لوګر کې د غنمو په حاصلاتو کې د تېر کال په پرتله ۲.۶ سلنه زیاتوالی هم راغلی دی.