کونړ کې د کبانو په ۱۸ فارم لرونکو د کبانو خوراکه اواړین توکي ووېشل شول
د کونړ دکرنې، اوبولګولو او مالدارۍ ریاست د مالدارۍ ځنځیري ارزښت پروژې د( USAID-DAI ) په مرسته د کونړ ولايت په نرنګ، سرکاڼو او څوکۍ ولسوالیو کې په ۱۸ کب روزونکو د کبانو خوراکه او اړین توکي وېشلي دي.
په دغو توکو کې ۱۸ ټنه دکبانو خوراکه، د کبانو نیولو جالونه، د کبانو نیولو جامې، PH او Thermometer شامل دي.
همدارنګه په ورته برخه کب روزونکو ته د کبانو فارم د مدیریت تر عنوان لاندې روزنه هم ورکړل شوه.
د وېش پرمهال د څوکۍ ولسوال د یادې ادارې څخه د مننې ترڅنګ غوښتنه وکړه، چې د کبانو برخه کې لازیاتې مرستې وشي تر څو دغه سکتور لا پیاوړي شي.
وروسته د کونړ د کرنې رياست چارواکي د کبانو روزنکو ته د وېشل شوي خوراکې په اهمیت رڼا واچوله او زیاته یي کړه، چې دغه خوراکه معیاري خوراکه ده، چې کبانو ته په ورکولو سره به ښه تغذیه او محصولات به مو زیات شي.
همداراز د مالدارۍ ځنځیري ارزښت د پروژې مسؤل انصارالله د کونړ د کرنې ریاست او د کبانو روزنکو ته ډاډ ورکړ چې په ورته برخه کې به لا زیاتې مرستې ترسره شي، تر څو د کبانو روزنې سکتور پیاوړي او د وارداتي کبانو مخه ونیول شي.
