هلمند کي له زېرمه شویو غنمو څخه وخت په وخت څارنه او ارزونه کېږي

۶ سلواغه ۱۴۰۳ھ.ش
۲۵ رَجَب المُرَجَّب ۱۴۴۶ه‍.ق
د هلمند ولایت د کرنې، اوبولګولو او مالدارۍ رییس مولوي نیازمحمد وهاج په لارښودنه ، ګډ پلاوي ته دنده سپارل شوې ده ترڅو په مرکز لښکرګاه کې، د کرنې ریاست په اړوندو درېیو زېرمتونو کې د زېرمه شویو غنمو څخه وخت په وخت لیدنه وکړي او د یادو غنمو د ښې ساتنې په برخه کې پر وخت لازم اقدامات ترسره کړي.
په همدې موخه یاد پلاوی په اوونۍ کې دوه الی درې ځلې یادو ګدامونو ته ورځي، ددوی په حضور کې ګدامونه خلاصېږي، د زېرمتونو صفایي، د ژوندیو خزندو او حشراتو مخنیوی په موخه د اړتیا پر مهال د درملو کارونې او د موجودو غنمو هر اړخیزه ارزونه ترسره کوي او بیا بیرته زېرمتونونه مهر لاک کوي.
د هلمند دکرنې ریاست چارواکي وایي، چې د زېرمه شویو غنمو د ښې ساتنې په موخه پوره هلې ځلې کوي، ترڅو خوندي پاتې شي.
د یادونې وړ ده، چې سږ کال په هلمند کې د عالیقدرامیرالمؤمنین (حفظه الله تعالی) د حکم له مخې ٥٨٦٨ ټنه مازاد غنم پېرل شوي دي، چې له دې ډلې څخه ١٦٣٢ ټنه په هلمند او ٤٢٣٦ ټنه کابل (مرکزي سیلو) ته لېږدول شوي دي.a