لغمان کې د کوکنارو بدیل معیشت په اړه درې ورځنی روزنیز ورکشاپ دائر شو  

په لغمان ولایت کې د کرنې، اوبولګولو او مالدارۍ وزارت د بدیل معیشت ریاست له لوري درې ورځنی روزنیز ورکشاپ ترسره شو، چې پکې د کرنې ریاست کارکوونکو ترڅنګ، د اقتصاد، چاپېریال ساتنې، امنیې قومندانۍ، اوبو او انرژۍ ریاستونو او غیر دولتي مؤسسو استازو ګډون کړی و.  
په ورکشاپ کې ګډونوالو ته د نشه‌یي توکو زیانونه، د بدیل معیشت طرحه او لاسته راوړنې، د بدیلو پروژو پروپوزلونو ترتیب او د کوکنارو د کښت بدیل موندلو اړوند موضوعات تشریح شول.  
د ورکشاپ د پای مراسمو ته د لغمان د کرنې، اوبولګولو او مالدارۍ رئیس الحاج مولوي عبدالستار محمد هم ورغی، چې د دغه پروګرام د تطبیق هرکلی یې وکړ او د کرنې وزارت له راغلي پلاوي یې مننه وکړه.  
نوموړي د نشه‌یي توکو زیانونه د اسلامي شرعیت له نظره روښانه کړل او ټینګار یې وکړ، چې د کوکنارو د کښت مخنیوي لپاره به کروندګرو ته نور عامه پوهاوي پروګرامونه هم پلي شي.