فراه کې ۱۴۸ مستحقو بزګرانو ته د کرنې او بڼوالۍ اړوند مرستې وویشل شوې
۱۹ لړم ۱۴۰۴ هـ.ش
۱۹ جُمَادَى الأول ۱۴۴۷ هـ.ق
د فراه ولایت د کرنې، اوبولګولو او مالدارۍ ریاست په همغږۍ، د «سیاچاې» مؤسسې له لوري او د خوړو نړۍوال پروګرام «ډبلیو.اف.پي» په مالي ملاتړ، د ګلستان او پرچمن ولسوالیو په کچه ۱۴۸ تنو مستحقو بزګرانو ته د کرنې او بڼوالۍ اړوند بېلابېلې مرستې ووېشل شوې.
د مرستو په دې وېش کې یو شمېر بزګرانو ته ۵۰ کیلوګرامه اصلاح شوی د غنمو تخم، ۵۰ کیلوګرامه توره سره، ۵۰ کیلوګرامه سپینه سره، او یو شمېر نورو ته ۵۰ کیلوګرامه توره سره، ۵۰ کیلوګرامه سپینه سره، ۱۰ کیلوګرامه کرنیز درمل، ۲ کیلوګرامه د پیازو تخم، یو عدد اره، یو عدد قیچي او یو عدد د درمل شیندنې ډبه ورکړل شوه.
د فراه د کرنې ریاست د معلوماتو له مخې، د دغو مرستو موخه د اصلاح شويو تخمونو دودول، د بزګرانو د حاصلاتو لوړول، د بڼوالۍ د برخې پیاوړتیا، د کرنیزو توکو د کمښت جبران او د سیمې د بزګرانو او بڼوالو د اقتصادي وضعیت ملاتړ دی.
مسؤولینو وویل، چې دغه پروګرام د کرنې وزارت، نړۍوالو مرستندویو ادارو او سیمهییزو ارګانونو د همکارۍ یوه مهمه لاسته راوړنه ده، چې د کرنیزو فعالیتونو د پراختیا او د بزګرانو د تولیدي ظرفیت د لوړولو لپاره عملي ګام ګڼل کېږي.
