د کرنې وزارت د کابل پوهنتون د کرنې پوهنځی زده کړیالانو ته د خپلو برنامو او کړنو په هکله مالومات ورکړ

۱۷ لړم ۱۳۹۹
د کرنې، اوبولګولو او مالدارۍ وزارت له خوا اکاډمیک او عامه بنسټونو ته د مالوماتو وړاندې کولو په لړ کې، د کرنې وزارت د طبیعي سرچینو د لوی ریاست چارواکو، د کابل پوهنتون د کرنې پونځی زده کړیالانو ته د طبیعي سرچینو له ډلې ځنګلونو، څړځایونو، خوندي شویو سیمو، طبي نباتاتو او ملي پارکونو په هکله مالومات وړاندې کړل.
په دې برنامه کې د کرنې وزارت د طبیعي سرچینو لوی رییس محمدرفیع قاضي زاده، د کرنې وزارت د فعالیتونو، لاسته راوړنو، برنامو، کړنو او د طبیعي سرچینو د ارزښت په هکله زده کړیالانو ته لازم مالومات وړاندې کړه.
ښاغلی قاضي زاده وویل «تېر کال یوازې د طبي نباتاتو له ډېلې انجې د پلور له لارې افغانستان ۱۰۰ میلیونه ډالر تر لاسه کړې ده. زموږ هېواد ډېر طبیعي سرچینې لکه ځنګلونه، څړځایونه، حیوانات او سرچیني لري، چې ارزښت یې میلیارډونو ډالرو ته رسیږي.»
په دې برنامه کې د کابل پوهنتون د کرنې پوهنځی نږدې ۱۰۰ تنه زده کړیالان شتون درلود، چې خپلې پوښتنې هم وړاندې کړل او د کرنې وزارت د طبیعي سرچینو لوی رییس له خوا د دوی پوښتنو ته ځوابونه ورکړل شوه.
د کرنې وزارت خلکو ته د مالوماتو وړاندې کولولو او بېلابېلو بنسټونو سره ددې وزارت د کړنو او برنامو د شریکولو په پار پروګرام په لاره اچولی دی.