د پکتيا پنځو ولسوالیو کې صحرایي ملخانو پر وړاندې د مبارزې په پار د عامه پوهاوی لړۍ پیل شوی دی
۱۶ وری ۱۴۰۰
د پکتيا د کرنې، اوبولګولو او مالدارۍ ریاست ددې ولایت په پنځو ولسوالیو «ځاځى اريوب، ډنډپټان، روحاني بابا، زرمت او مرکز» کې د ملخانو د احتمالي راتګ د مخنیوي او صحرایي ملخانو سره د مبارزې په پار بزګرانو ته د عامه پوهاوي لړۍ پیل کړی دی. د عامه پوهاوي دا لړۍ د پکتيا ولایت په يادو پنځو ولسوالیو کې پیل شوی دی.
د پکتيا د کرنې ریاست چارواکي وایي، چې د عامه پوهاوي په دې لړۍ کې به د یادو ولسوالیو ۸۰۰ بزګران د ملخانو د کنټرول میکانیزم، د صحرایي ملخانو پېژندنه، د جرونو یا کندو کېندل، د صحرایي ملخانو اصلي منشا پیداکول او درملو استعمال په اړه به وروزل شي.
د عامه پوهاوي یاد پروګرام به 10 ورځې دوام ولري او په راتلونکې کې به نورو هغو ولسوالېو ته چې، ددې ډول ملخانو تر تهدید لاندې وي هم وغځول شي.
صحرایي ملخان په هر وخت او هر فصل کې پیداکېږي او هر ډول نباتاتو او بوټو ته زیان اړوي. صحرایي ملخانو په تېرو کلونو کې په ځینو ولسوالېو کې بزګرانو ته ستر زیانونه اړولې وه نو ځکه د پکتيا کرنې ریاست سږ کال مخکې له دې، چې بزګرانو ته یاده ستونزه پیداشي د خپلو متخصصینو پر مټ وقایوي پروګرامونه په لاره اچولي دي.
