د هلمند د غنمو سږني حاصلات به نږدې ۵۰۰ زره ټنه وي

۲ غبرګولی ۱۴۰۰
د هلمند دکرنې، اوبولګولو او مالدارۍ ریاست وايي، چې په دې ولایت کې د غنمو لو پیل شوې ده، چې د اټکل له مخې دیاد ولایت د غنمو سږني حاصلات به نږدې ۵۰۰ زره ټنو ته ورسېږي.
د هلمند د کرنې رییس زلمی الکو وایي، چې سږکال ددې ولایت په ۱۱۵ زره هکټاره ځمکه غنم کرل شوي دي، چې له دغو کروندو څخه به د اټکل له مخې نږدې ۵۰۰ زره ټنه غنم ترلاسه شي.
زلمی الکو وایي، چې د نورو کلونو په توپیر د هلمند سږني غنم له نباتي ناروغیو او افتونو پاک دي.
ښاغلی الکو زیاته کړه، چې دهلمند دکرنې ریاست په کرنیزه برخه کي ګڼ هلمندي کروندګرو ته روزنه ورکړې او ترڅنګ یې دغنمو  بېلابېل اصلاح شوي تخمونه هم ورته ورکړي دي.
په همدې حال کې هلمندي بزګران هم د غنمو له حاصلاتو خوښ دي او وايي، سږکال د نورو کلونو په پرتله د غنمو د ښه  حاصلاتو  هیله لري، هغوی وایي د تېرو کلنو په پرتله دغنمو سږني کروندې له هرډول طبیعي افتونو او ناروغیو پاک دي.