د هلمند د جوارو حاصلات ۲۰ سلنه زیات شوي

۴ لیندۍ ۱۳۹۹
هلمند د هېواد په کچه لوى او کرنيز ولايت دى. جوار، غنم، لوبيا، ممپلي، رومي، بينډۍ، پنبه، تور مۍ او زعفران يې ښه حاصل ورکوونکي کرنيز حاصلات دي. د هلمند یوشمېر کروندګر هرکال زرګونه هکټاره ځمکه کې د جوارو کرکېله کوي او له خپلو حاصلاتو خوښ دي.
د هلمند د کرنې، اوبولګولو او مالدارۍ ریاست چارواکي وایي، چې د تېرکال په پرتله ددې ولایت د جوارو په حاصلاتو کې ۲۰سلنه زیاتوالی راغلی دی.
د هلمند دکرنې، اوبولګولو او مالدارۍ رییس زلمی الکو وایي، چې سږ کال ددې ولایت په درې زره او ۸۰۰ هکټاره ځمکه کې جوار کرل شوې وه، چې له دغو کروندو څخه څه باندې لس زره ټنه جوار تولید شوي دي. د ښاغلي الکو په خبره دغه شمېره د تېرکال په پرتله په دې ولایت کې د جوارو د حاصلاتو ۲۰ سلنه زیاتوالی ښیي.
د هلمند د کرنې، اوبولګولو او مالدارۍ رییس زلمی الکو وایي: «د هلمند اقلیم د جوارو کرکېلي لپاره مناسب اقلیم دی او په دې ولایت کې د جوارو بېلابېل ډولونه کرل کیږي او د پلور لپاره نورو ولایتونو ته صادریږي.»
د ښاغلي الکو په خبره د روان کال د حاصلاتو د زیاتې کچې لاملونه پریمانه اوبه، د اصلاح شوي تخمونو وېش، جوارو کرکېلي ته د بزګرانو لېوالتیا او په دې برخه کې د بزګرانو روزل دي. ددې ترڅنګ دهلمند د کرنې ریاست د مسلکي کارکوونکو له خوا د هلمند په مرکز او ولسوالیو کې بزګرانو ته د نباتي ناروغیو د مخنیوي لارې چارې ښودل او د کیمیاوي سرو او اصلاح شویو تخمونو وېشل یې نور لاملونه دي.
هلمند د هغو ولایتونو په ډله کې ده، چې د بېلابېلو کرنیزو توکو د کرکېلي لپاره مناسبه هوا لري په دې ولایت کې تر ډېره غنم، جوار، لوبیا او نور ډول ډول کرنیز توکي کرل کیږي، چې ښې پایلې ورکوي.