دا په هلمند کې د لړمانو روزنې دویم ستر فارم دی. تر دې وړاندې هم په دې ولایت کې د لړمانو روزنې یو فارم جوړ شوی، چې ۱۶زره لړمان په کې روزل کیږي.د هلمند د کرنې ریاست د چارواکو په خبره په پام کې ده، چې په دې ولایت کې د لړمانو نور فارمونه هم جوړ شي.

د کرنې، اوبولګولو او مالدارۍ وزارت وايې، چې د لړمانو او د لړمانو د تولید یوشمېر نور فارمونه هم په ځینو ولایتونو کې د جوړېدو په حال کې دي، چې ور سره به په دې برخه کې د پام وړ پر مختګ وشي.

د فارم چارواکي وايي، چې یاد فارمونه یې له هېواد څخه د لړمانو د قاچاق د مخنیوي په موخه جوړ کړي دي.

دوی وايي تر اوسه یې زرګونه لړمان راټول کړي او حکومت څخه غوښتنه کوي، چې په نړیوال بازار کې د پلور لپاره ورته زمینه برابره کړي.

د لړمانو خوراکه چنجي دي او هر لړم درې میاشتو کې شپږ څاڅکي زهر تولیدوي، چې د یو کیلو زهرو بیه نږدې لس میلیونه ډالرو ته رسیږي.

له دغو لړمانو څخه به تر لاسه کېدونکي زهر یو شمېر بهرنیو هېوادونو ته صادر شي.

د لړم له زهرو کار اخيستنه:

په نړۍ کې د لړم زهر له ډېرو ارزښتناکو مايعاتو څخه شمېرل کيږي، چې د سرطان، ملاریا او د انتي بیوتيک درملو کې ترينه کار اخيستل کيږې. ويل کيږې چې د لړمانو زهر د يو ډول مادې درلودونکې دي، چې د سرطاني تومورونو په پېژندنه کې ترينه ګټه اخيستل کيږې. دا زهر په امريکا، اروپايي اوعربې هیوادونو کې بازار لري.

د معلوماتو له مخې د لړمانو يو کيلوګرام زهر د نړۍ په بازارونو کې له يو ميلون څخه تر لس مليونه ډالرو پورې، پلورل کيږې. د لړمانو زهر څخه د طبابت په برخه کې د سرطان لوړې بیې لرونکې درملو لپاره کارول کیږي، نو د زهر بیې ته په کتو له همدې کبله یې خلکو پالنې ته مخه کړې ده.

باید وویل شي، چې دکرنې وزارت خپلو ټولو ولايتې ادارو ته سپارښتنه کړې، چې په دې برخه کې له خلکو سره مرستې وکړي او د لړمانو روزنې لېوالو خلکو ته چې غواړي د لړمانو فارمونه جوړ کړي فنې لارښوونې وکړې، تر څو د دغه ډول فارمونو شمېر زیات شي.