د میدان وردګو ولایت په مرکز کې یوشمېر لبنیات پلورونکي وروزل شول
۳۱ چنګاښ ۱۴۰۴ ه.ش
۲۶ مُحَرَّمُ الحَرام ۱۴۴۷ه.ق
د میدان وردګو ولایت په مرکز میدان ښار کې د ملګرو ملتونو د پراختیایي پروګرام «یو،ان،ډي،پي» او د کرنې، اوبولګولو او مالدارۍ ریاست له خوا د لبنیاتو پلورونکو ته تخنیکي روزنه ورکړل شوه.
په دې روزنیز پروګرام کې هغو لبنیاتو پلورونکو ګډون کړی و، چې له مخکې ورته د «یو،ان،ډي،پي» مؤسسې لخوا د لبنیاتو اړوند مختلف وسایل توزیع شوي وو.
په دغه روزنیز پروګرام کې د «یو،ان،ډي،پي» مسؤلینو او د کرنې ریاست اړوند د څارویو د روغتیا آمر محمدالله شهیدزي او مل پلاوي ګډون کړی و. ګډونوالو د لبنیاتو پلورونکو ته د شکایتونو د ثبت، ستونزو د شریکولو او د لبنیاتو د ښه پروسس، ساتنې او پلور په اړه لازمي مشورې او تخنیکي لارښوونې ورکړې.
د پروګرام ګډونوالو ته دا سپارښتنه وشوه، چې خپل کارونه په دقت او مسلکي ډول ترسره کړي، تر څو د کیفیت او خدمتونو په برخه کې له هر ډول ستونزو سره مخ نه شي.
همدارنګه هغوی ته هدایت ورکړل شو چې که د لبنیاتو د پروژې د تطبیق په برخه کې له هر ډول ستونزو، اندېښنو، نظرونو، وړاندیزونو یا شکایتونو سره مخ شي، باید لومړی د کرنې ریاست مسؤلینو سره اړیکه ونیسي. د کرنې ریاست مسؤلین ژمنه وکړه چې د ستونزو د حل لپاره به ژر تر ژره لازم ګامونه پورته کوي.
په پای کې، د لبنیاتو پلورونکو د «یو،ان،ډي،پي» مؤسسې او د کرنې ریاست له ټولو مسؤلینو څخه د زړه له کومې مننه وکړه او دا ډول برنامې یې د خپل کاروبار د پراختیا او د لبنیاتو د کیفیت د لوړولو لپاره ارزښتمنې وبللې.
د میدان وردګو ولایت د کرنې ریاست مسؤلین وایي، چې د لبنیاتو سکتور د پراختیا لپاره به دا ډول روزنیزې برنامې دوام پیدا کړي، ترڅو د ولایت کروندګر، مالداران او لبنیات پلورونکي له لازمو مسلکي مهارتونو برخمن شي.
