جنوب لویدیځ زون کې تر څلورزره ټنه زیات د غنمو اصلاح شوي تخمونه تولیدېږي
۱ زمری ۱۴۰۲ه.ش
۶ مُحَرَّمُ الحَرام ۱۴۴۵ه.ق
د هلمند ولایت د کرنې، اوبو لګولو او مالداری ریاست په مستقیمه همکارۍ، دجنوب لویدیځ زون د اصلاح شویو تخمونو د تصدیق ورکولو امریت د مسلکي او فنی کارمندانو له خوا، په هلمند، کندهار او اروزګان ولایتونو کې د اصلاح شویو غنمو د تولید ټول مراحل بشپړ شوي دي، چې دا مهال یې د پروسس چارې دوام لري.
سږکال په جنوب لویدیځ زون کې ٢٣.٨ متریک ټنه د غنمو مورني اصلاح شوي تخمونه د هلمند او کندهار ولایتونو څېړنیزو فارمونو کې، د هلمند داصلاح شویو تخمونو تصدۍ کې ١٦٠ متریک ټنه بنیادي او ٥٨٦.٧ ټنه تصدیقي تخمونه، د کندهار ولایت تصدۍ کې ٩٦ متریک ټنه بنیادي او ٣٤٧.٢ متریک ټنه تصدیقي تخمونه، او همدارنګه د اصلاح شویو تخمونو خصوصي شرکتو لخوا په هلمند او کندهار ولایت کې ٢٩٥٢.٧٧٥ متریک ټنه تصدیقي، چې ټول ٤١٦٦.٤٧٥ متریک ټنه کېږي د غنمو اصلاح شوي تخمونه په لوړ کیفیت سره تولیدېږي.
نوموړي تخمونه به د هلمند ولایت سربېره، کندهار، اروزګان او د ګڼو نورو ولایتونو کرونده ګرو په واک کې ورکول شي ترڅو له مخې یې ځمکوال لوړ حاصلات ترلاسه کړي.
د هلمند ولایت کرنې اداره هڅه کوي، ترڅو د جنوب لویدیځ زون لپاره د تخمونو د اصلاح، تکثیر او ترویج برخه کې لا زیات کار وکړي، ترڅو د بزګرانو په کرنیز اقتصاد کې بهبود رامنځته شي.
د غنمو اصلاح شویو تخمونو تولید د بزګرانو د حاصلاتو لوړولو کې رغنده رول لري او همدارنګه هېواد د غنمو د تولید په برخه کې ځان بسیاینې ته نږدې کوي.
