د عالیقدر امیرالمؤمنین حفظه الله د شفاهي لارښوونې له مخې د هېواد ټولې ځمکې د مرعي او څړځایونو په ګډون سروې کېږي
د کرنې، اوبولګولو او مالدارۍ وزارت د ځمکو چارو ریاست چارواکي د یوې غونډې په ترڅ کې وویل، چې د عالیقدر امیرالمؤمنین حفظه الله د شفاهي لارښوونې له مخې د هېواد ټولې ځمکې د مرعي او څړځایونو په ګډون سروې کېږي.
په دې غونډه کې، چې د ځمکو ادارې د رهبري په مشرۍ د دغه ادارې په مقام کې ترسره شوه؛ د تصفیې، کدستر، د ځمکې د معلوماتو د سیستم او د جیودیزۍ ریاستونو مسوولين په کې ګډون درلود.
د غونډې په پیل کې د ځمکو ادارې لوی رییس ملا عبدالرحمن رحماني د ریاستونو مسوولینو ته لارښوونه وکړه، چې عالیقدر امیرالمؤمنین حفظه الله د لارښوونې د پلي کولو په موخه دې یوه جامع کړنلاره ترتيب کړي، چې د ځمکوالۍ ټول اړخونه پکې شامل وي.
همداراز د ځمکې ادارې لوی رییس د اړوندو څانګو له چارواکو وغوښتل، چې هره څانګه مکلفه ده تر څو خپل دوه تنه مسلکي او تجربه لرونکي کارکوونکي د استازي په توګه د دغه کړنلارې د جوړولو او ښه تنظیم په موخه دې د ادارې مقام ته معرفي او همدارنګه د ریاستونو د استازو ترمنځ د ښه همغږۍ لپاره دې یو وتسپ ګروپ هم جوړ کړي.
د اړوندو څانګو مسوولینو د ځمکې د ادارې له مشرتابه څخه د مننه تر څنګ، د هر ډول همکارۍ ژمنه وکړه.
