پکتیا کې ۴۰ تنو ځنګل میشتو ته عامه پوهاوی ورکړل شو
د پکتیا دکرنې، اوبولګولو او مالدارۍ ریاست په دې ولایت کې د ځنګلونو د خوندیتوب او پراختیا په پار هلې ځلې کړندي کړي دي، چې د دغو هلو ځلو په دوام د پکتیا ولایت د میرزکې ولسوالی اړوند د غونځۍ کلي ځنګل میشتو اوسیدونکو ته د ځنګل ګټو، ارزښت او ساتلو په هکله عامه پوهاوی ورکړل شو.
د پکتیا ولایت کرنی، اوبولګولو او مالدارۍ ریاست اړوند د میرزکې ولسوالی د ترویج عمومي مدیریت لخوا د غونځۍ کلي د ځنګلي سیمو ۴۰ تنو اوسیدونکو ته د ځنګلاتو ګټو، ارزښت، د تخریب مخنیوي او د ځنګل بیارغولو په هکله د ځنګلاتو قانون، طرحو، علمي او مسلکي معلومات ورکړل شول.
همدارنګه د ځنګل میشتو اوسیدونکو مسؤلیتونه د ځنګل ساتلو په موخه هم بیان شول او د غونځۍ کلي اوسیدونکو د ځنګل ساتونکي هم معلوم کړل.
ددې پروګرام موخه په دې ولایت کې د ځنګلونو خوندیتوب او پراختیا ښودل شوی دی.
