ننګرهار کې د مالټې څه باندې ۱۱۰ جریبه بڼونه جوړېږي

د ننګرهار کانال ریاست چارواکي وایي، چې سږکال د ننګرهار کانال په څه باندې ۱۱۰۰ جریبه ځمکه د مالټې نوې بڼونه جوړېږي.
د ننګرهارکانال رییس مولوي غلام الرحمن کظیم وویل: «د زرغونتیا په پار مو هلې ځلې ګړندي کړي، د دویم فارم لومړي بلاک (۱۵،۱۳،۱۱)نمره ځمکه کې د اټکل له مخې د ۲۰ ميليونه افغانيو په ټولیز لګښت په ۱۱۰ جریبه ځمکې باندې د مالټې بڼونه  جوړېږي، په داسې حال کې چې تردې دمه په سلګونه جریبه ځمکې د مالټې بڼونه جوړ شوي دي.»
ښاغلی کظیم زیاته کړه:  «پلان لرو او په دې اړه مو هڅې ګړندي کړي هم دي چې د ننګرهارکانال ریاست په ځمکو کرل شوو مالټه باغونو حاصلاتو ته بهرنې بازار پېدا کړو.»
د ننګرهار د کانال ریاست چارواکي وایي، چې ددې پروګرام په پلي کولو سره به په دې سیمه کې شاړې ځمکې ابادې او ورسره به د سیمې زرغونتیا او ښېرازۍ ته هم زمینه برابره او ترڅنګ به یې ددې ولایت د مالټو د حاصلاتو کچه هم لوړ شي.
ننګرهار د سټروسو مېوو لکه مالټې، نارنج او لیمو ونو لپاره مناسب اقلیم لري او په دې وروستیو کې په دغه ولایت کې دسټورو سلګونه جریبه بڼونه جوړ شوي دي.