ننګرهارکې له ۷۵ کروندګرو سره مرستې وشوې
د اسلامیک ریلیف مؤسسې لخوا د ننګرهار د کرنې، اوبولګولو او مالدارۍ ریاست سره په همغږۍ د کوټ او کوزکونړ ولسوالیو ۷۵ تنه کروندګرو سره د لمریزې تخطې، بطرۍ او نور اړوند وسایلو مرسته وشوه.
دکوز کونړ په ولسوالۍ کې د وېش پر مهال د ننګرهار دکرنې ادارې ريس مولوی عبدالستار محمد یادونه وکړه، چې د دغه مرستو له ډلې څخه ۳۶ تنه د کوزکونړ ولسوالی او ۳۹ تنه د کوټ ولسوالی کروندګرو ته یوه تخته سولر، یوه بطرۍ او نور اړین وسایل ورکول کېږي.
محمد زیاته کړه، چې وړاندې تر دي په دغه دواړو ولسوالیو کې د یادې مؤسسې لخوا ۶۰۰ بزګرانو ته د جوارو هایبریډ تخمونه او کیمیاوی سرې هم وېشل شوي، چې د حاصل څخه یي کروندګر خوښ و.
هغه زیاته کړه چې د ننګرهار د کرنې ریاست پدې هلو ځلو کې دي چې نور همکار موسسات هم را جلب کړي تر څو د ولسوالیو بزګرانو او مالدارانو سره ښې مرستې وکړي، او د کرنې او مالدارۍ برخه کې پرمختیايي پروژی تطبیق کړي.
ورته مهال د کوزکونړ ولسوالی ولسوال مولوی خالد د اسلامیک ریلیف مؤسسې څخه مننه وکړه او د ننګرهار دکرنې ادارې رییس ته يي ډاډ ورکړ چې د پروژو په تطبیق کې به د کرنې او مالدارۍ برخې همکارو موسساتو سره پوره همکاري کوي.
