کونړ کې د پنځو کانالونو د ترمیم او پاکولو چارې پیل شوې چې کرنیزو ځمکو ته د اوبو رسولو ترڅنګ به پکې ۴۷۷۷ تنو ته لنډ مهاله کاري فرصتونه رامنځته شي. 

چهار شنبه،۱۱، لړم ، ۱۴۰۱ هــ ش 
د کونړ کرنې اوبولګولو او مالدارۍ ریاست تر څارنې لاندې د UNDP ـ ملګرو ملتونو پر مختیایي ادارې په مالي ملاتړ د اسلامیک ریلیف موسیسې له خوا د ۳۱،۹ میلیونه افغانیو په ارزښت د وټه پور ولسوالۍ په نږدې او لیرې پرتو سیمو کې د ۶۴ کیلو متره کانالونو د ترمیم او پاکولو چارې پیل شوي چې نږدې یوه میاشت کې به بشپړ شي. 
د کونړ ولایت د کرنې اوبو لګلولو او مالدارۍ رییس مولوي عزت الله هدایت وویل، دغه ولایت کې تیرو سختو بارانونو او سېلابونو له امله بزګرانو ته سخت زیانونه اوښتي او په زیاتو سیمو کې کانالونه ترمیم او پاکولو ته ضرورت لري، چې د همدغو هڅو په لړ کې وټه پور او سرکاڼو ولسوالیو کې د کانالونو د ترمیم او پاکولو چارې دوام لري. 
د ولایت مقام مالي او اداري رییس حامد ابراهیم شاهین او خاص استازي مولوي جان محمد چې د دغو کانالونو د چارو پیل او ارزونې په موخه سیمې ته ورغلي وو، د مرستندویه موسیسو له همکاریو څخه د مننې ترڅنګ یې د دغه ولایت په لیرې پرتو او وروسته پاتې سیمو کې د ورته نورو پروژو د تطبیق ډاډ وښود. 
ځایي خلکو بیا دغسې پروژې د بزګرانو حاصلاتو او  خلکو اقتصادي ودې لپاره مهمې یادې کړې او د پراختیا غوښتنه یې وکړه.