دکرنې وزارت دکرنې او مالدارۍ مرستيال د ريشخور له مسلخ څخه ليدنه وکړه

۲۳ لړم ۱۴۰۰ هـ.ش
۸ ربیع الثاني ۱۴۴۳ هـ.ق
دکرنې، اوبولګولو او مالدارۍ وزارت مرستيال مولوی صدراعظم، د کابل په ريشخور کې له جوړه شوې مسلخ څخه د ليدنې په ترڅ کې وويل، چې ياد مسلخ به ډېر ژر خصوصي سکټور ته د پانګونې او ګټې اخيستنې په پار وسپارل شي.
ددې مسلخ رغنيزې چارې څلور کاله مخکې دکرنې وزارت له خوا د کابل ولايت د ريشخور ولسوالۍ  په سرک کاريز سيمه کې په ۲۵جريبه ځمکه کې  پيل شوې وه، چې  په يوه کاري شفت کې د ۱۰۰غواو او ۵۰۰ پسونو د معياري ذبحې او پروسس وړتيا لري.
دکرنې وزارت تخنيکي ټيم د ياد مسلخ  له جوړولو او کاري کيفيت څخه څارنه وکړه. 
ددې مسلخ د جوړولو موخه صحي او باکيفيته غوښه چمتو کول، د سالمو او صحتمندو څارويو ذبح، د چاپېريال د ککړتيا مخنيوی، د صحي او سالمو حيواني محصولاتو توليد، د ساري ناروغيو د خپرېدو مخنيوی، د ناروغو څارويو د ذبحې مخنيوی، په مناسبه توګه د غوښې ساتل او مشتريانو ته په مناسبه او صحي ډول د غوښو لېږدول دي.