د نيالګيو توليدوونکو مؤسسو غړو سره دکرنې او مالدارۍ مرستيال غونډه

۱۳ تله ۱۴۰۰
د ا.ا.ا دکرنې، اوبولګولو او مالدارۍ وزارت دکرنې او مالدارۍ مرستيال مولوی صدراعظم، دنيالګيو توليدوونکو مؤسسو (ممقا) رييس او غړو سره دکرنې وزارت په مقر کې کتنه او خبرې اترې وکړې.
په دې ناسته کې له ۲۳ ولايتونو څخه د ممقا موسسې غړې ګډون درلود او د خپلو فعاليتونو په هکله معلومات وړاندې کړل. هغوی دغه راز د دوی پر وړاندې د شته ستونزو او ننګونو د هوارولو غوښتونکي شول.
مولوی صدراعظم وويل: "ستاسو ملاتړ ته ژمن يو. بزګران د ټولنې غريبه طبقه ده،  چې همکاريو ته اړتيا لري. زموږ په اداره کې رشوت، فساد او بې کفایتي نشته. انشاءالله روڼتيا راولو او د ټولنې ټولو پرګنو په ځانګړې ډول بزګرانو لپاره چوپړتياوو وړاندې کولو ته چمتو يو، له تاسو هم غواړو چې معياري او باکيفيته توليدات ولرئ، هڅه وکړئ خپلې چارې پر څېړنو استوار کړئ او اصلاح شوي نيالګي چمتو کړئ. په دې سره د خلکو غوښتنې پوره کېږي او تاسو ته هم ګټه لري."
د ممقا رييس حاجي عبدالستار مبارز، وويل: "د ممقا ادارې ۳۰ټولنې لري او درې کاله کېږي،  چې د نيالګيو د توليد په برخه کې يې افغانستان پر ځان بسيا کړئ دی. ددې موسسې ټولې چارې معياري دي. دکرنې وزارت له نوې مشرتابه څخه غواړو چې د ولايتونو رييسانو ته هم سپارښتنه وکړي،  چې له دې موسسې سره همکاري ولري."
هغه زياته کړه،  چې په تېر کې په ياده برخه کې يوشمېر ستونزې شتون درلود. هغه هيله وښود چې د کرنې وزارت اوسنۍ مشرتابه د ستونزو لرې کولو لکه فساد اي سهل‌انگارۍ ته پاملرنه وکړي.