هلمند کې د کبانو روزنې ترویجي فارم جوړیږي

۲۲ چنګاښ ۱۳۹۸
دهلمند د کرنې، اوبولګولو او مالدارۍ ریاست چارواکي وایي، چې د لومړي ځل لپاره په دې ولایت کې دکبانو روزنې ترویجي فارم جوړیږي.
د هلمند دکرنې رییس زلمی الکو وایي، چې یاد فارم په دوه جریبه ځمکه کې جوړیږي. ښاغلی الکو وویل، چې ددې فارم تر جوړېدو وروسته به د دې ولایت د کبانو فارم لرونکي ترې وخت ناوخت لیدنه کوی او د کب روزنې د کارپوهانو له خوا به په بېلابېلو برخو کې دوی ته اړینې سلا مشورې هم ورکول کیږي.
د هلمند دکرنې رییس زیاته کړه، چې دکرنې ریاست په پام کې لري، چې ددې ولایت د کب روزنې برخه پیاوړي کړي، ترڅو یاد ولایت د کبانو په برخه کې له وارداتي حالت څخه صادراتي حالت ځان ته غوره کړي.
ددې فارم د جوړولو موخه داده، چې هلمندیان د کب روزنې فارمونو جوړولو ته وهڅیږي او له یاد فارم څخه د زده کړې ترڅنګ د کبانو اصلاح شوي نسلونه هم تر لاسه کړي.