پراګ کې د افغانستان پلاوي، دکرنې سکټور په برخه کې د پانګونې فرصتونه تشريح کړل
۲۷ غبرګولی ۱۴۰۰
دکرنې وزارت د اوبولګولو او طبيعي سرچينو مرستيال حشمتالله غفوري، د صنعت او سوداګرۍ وزير نثار احمدغورياني، د کانونو او پټروليم وزير هارون چخانسوري، د ملي تدارکاتو لوی رييس کبیر عیسیخېل او دغه راز د جمهوري رياست د چارو ادارې د پانګونې د اسانتيا دبرخې رييس عطاالله نصیب په ګډون پلاوي د چک جمهوريت ته تللي او د چک جمهوريت پلازمېنه د پراګ په ښار کې ددې هېواد له سوداګرو او سلواکيا دولت سره د افغانستان د کرنيزو محصولاتو د سوداګرۍ او پانګونې په برخه کې پر فرصتونو خبرې کړي دي.
دکرنې وزارت د اوبولګولو او طبيعي سرچينو مرستيال حشمتالله غفوري وايي، چې ددې پلاوي غړي د چک جمهوريت او سلواکيا دولتونو پانګوالو ته د پانګونې په برخه کې د شته فرصتونو په هکله اړين مالومات وړاندې کړل.
حشمتالله غفوري د يادو هېوادونو پانګوالو ته د اړينو مالوماتو په وړاندې کولو سره وويل چې، په افغانستان کې د کرنيزو محصولاتو، خوراکي توکو او لبنياتو د پروسس او بستهبندی او د کرنيزو ماشينونو چمتوکولو او د اغېزناکو اوبولګولو سيسټمونو د ښه والي په برخه کې د پانګونې ښې فرصتونه شتون لري. هغه دغه راز وويل، چې زعفران، انجه، ځنغوزې، چهارمغز او يوشمېر نور ارزښت لرونکي محصولات په نړيوالو بازارونو کې ډېر مينه وال لري.
