نورستان کې نباتي ناروغیو او افتونو سره د مبارزې کمپاین پیل شو

۲۷ سلواغه ۱۳۹۹
د نورستان د کرنې، اوبولګولو او مالدارۍ ریاست له خوا په دې ولایت کې نباتي ناروغیو او افتونو سره د هر اړخیزې مبارزې کمپاین په لاره اچول شوی دی.
په دې کمپاین کې دیاد ریاست د فني کارکوونکو له خوا بڼوالو او بزګرانو ته د نباتي ناروغیو او افتونو د وقایې هر اړخیزي لارې چارې په عملي او نظري ډول ښودل کېږي.
د نورستان د کرنې ریاست د چارواکو په وینا، چې ددې کمپاین په ترڅ کې بڼوالو او بزګرانو ته د ترکیبي درملو جوړولو لارې چارې ښودل کېږي او دغه راز ددې پروسې له لارې شاوخوا ۲۰۰ بڼوالو ته بورډومیکسچر ژمني تېل اونور وقایوي درمل هم ورکول کېږي.
د چارواکو په خبره؛ د ترکیبي درملو په استفادې سره د ونو مضره حشرې، د ونو پر تنو ځالګۍ او بېلابېلې ناروغۍ له منځه ځي، چې په پایله کې ونې او ښاخونه ښه وده او نمو کولی شي.
د نورستان د کرنې ریاست هلې ځلې کوي، چې بزګران د کیمیاوي درملو د استفادې پر زیانونو وپوهوي او ددغو ګواښونو د مخنیوي په پار د افتونو او ناروغیو مخه په میخانیکي لارو چارو ونیسي ترڅو له روغتیايي او اقتصادي پلوه ګټور تمام شي.