د بڼوالۍ ځنځیري ارزښت د پراختیا پروژه په غزنې کې د کچالو ۴۷ زېرمتونونه جوړوي
۲ لیندۍ ۱۳۹۹
د کرنې وزارت د بڼوالۍ ځنځیری ارزښت د پراختیا پروژې له لارې په غزني کې د کچالو د ۴۷ زېرمتونونو رغنیزې چارې ۹۵ سلنه بشپړ کړي دي.
دغه زېرمتونونه تر یوې اوونۍ ګټې اخیستنې ته سپارل کیږي.
ددغو زېرمتونونو د جوړولو ټولیز لګښت ۲۸ میلیونه او ۹۲۹ زره او ۱۵۸ افغانۍ ده. ددغو زېرمتونونو ۸۰ سلنه لګښت د کرنې وزارت او ۲۰ سلنه نور لګښت یې برخمن شوي بزګران ورکوي.
دغه زېرمتونونه هر یوه یې د ۱۲ مټریک ټنه کچالو د ساتنې وړتیا لري. له دغو زېرمتونونو څخه په ګټې اخیستنې سره، د غزني ولایت بزګران کولای شي، چې د کال ۵۶۰ مټریک ټنه کچالو زېرمه کړي. تېرکال په غزني کې یو زر او ۸۰ هکټاره کچالو کرل شوې وه او له دغو کروندو څخه ۲۷ زره ټنه کچالو تولید شوې وه.
