فراه کې ۴۰ لویې شنې خونې جوړې شوې

۱۳ لړم ۱۳۹۹
د کرنې وزارت ددې وزارت د یوې پروژې له لارې د فراه ولایت د پشت رود او خاک سفید په ولسوالیو کې د سیمې یوشمېر بزګرانو ته ۴۰ لویې شنې خونې جوړې کړې. دغه شنې خونې هر یوه یې په ۳۰۱ متر مربع ځمکه کې رغول شوی دی.
دکرنې وزارت ددې پروژې له لارې، ددغو شنوخونو د رغنیزو چارو په بشپړېدو سره سم، له دغو شنوخونو څخه پر برخمن شویو بزګرانو د کرکېلي او حاصل ټولولو ۲۲ توکي هم وېشلي دي.
په دغو وېشل شویو توکو کې «۶۰۰Watt» لمریزې تختې، اصلاح شوي تخمونه، د درمل شیندولو پمپ، د شنې خونې د حاصلاتو ټولولو بستې، حیواي او کیمیاوي سرې، کراچۍ او پلاستیک شامل دي.
د کرنې وزارت ددې پروژې له لارې تر دې دمه د فراه ولایت په پشت رود او خاک سفید ولسوالۍ کې په ټولیزه توګه بزګرانو ته ۲۰۵ شنې خونې جوړې کړي دي.
ددغو شنوخونود جوړولو موخه د ارزښت لرونکو کرنیزو توکو دودول، د بزګرانو د پوهې کچه لوړول، له کمې ځمکې څخه ډېر حاصل اخیستل او په یوه کال کې له شنوخونو څخه درې فصله محصولات راټولول دي، ترڅو بزګران د حلال کښت له لارې عواید تر لاسه او له حرام کرکیلې څخه ځان وژغوري.