زابل کې د زعفرانو لس ننداریزې قطعې جوړیږي
۱۶ چنګاښ ۱۳۹۹
د زابل د کرنې، اوبولګولو او مالدارۍ ریاست په دې ولایت کې د زعفرانو د کرکېلي د دودولو په پار د زعفرانو لس ننداریزې قطعې جوړ وي. په همدې موخه د زابل د کرنې ریاست ددې ولایت پر لسو بزګرانو د زعفرانو ننداریزو قطعو جوړولو په موخه د زعفرانو پیاز او د زعفرانو د کرکېلي اړونده توکي وېشلي دي.
د زابل د کرنې ریاست وایي، چې ددې ولایت په شاه جوی ولسوالۍ کې د زعفرانو د دودولو په پار لس ننداریزې قطعې جوړیږي. د دوی په خبره ددغو ننداریزو قطعو د جوړولو په پار پربزګرانو د زعفرانو پیاز او نور اړونده توکي وېشل شوي دي. د زابل دکرنې ریاست دغه راز وویل، چې ددغو توکو ترڅنګ یادو بزګرانو ته د قلبې او د ځمکې د هوارولو لګښتونه ورکړل شوي او په یاده برخه کې روزل شوي هم دي.
د زابل دکرنې ریاست وویل، چې ددغو مرستو موخه په دې ولایت کې د زعفرانو د کرکېلي دودول او له دې لارې د بزګرانو د عوایدو زیاتول دي. دوی وویل، چې د زابل ولایت اقلیم د زعفرانو کرکېلي لپاره مناسبه اقلیم ده او هیله یې وښودله چې په دې ولایت کې د زعفرانو کرکېله پراخه شي.
