د ننګرهار کوزکونړ کې یوشمېر نیالګیو روزونکو سره  د اړینو توکو او موادو مرسته وشوه

۲۱ وږی ۱۴۰۵ هـ.ش
۲۹ رَبِیعُ الْأَوَّل ۱۴۴۸ هـ.ق
د نیالګیو د معیاري تولید، د شنو سیمو د پراختیا او د بڼوالۍ د ودې په موخه، د ننګرهار د کرنې، اوبو لګولو او مالدارۍ ریاست په هڅو، د ډاکار  مؤسسې په تخنیکي او د ملګرو ملتونو د نشه‌یي توکو او جرمونو سره د مبارزې ادارې  په مالي ملاتړ، د دې ولایت کوزکونړ ولسوالی۲۰ تنو نیالګیو روزونکو ته د نیالګیو د روزنې اړین وسایل او مواد ووېشل شول.
د معلوماتو له مخې، د دغې مرستې ټولیز ارزښت ۸۰۰ زره افغانۍ دی، چې هر نیالګیو روزونکي ته د شاوخوا ۴۰ زره افغانیو په ارزښت په یوه جریبه ځمکه کې د نیالګیو د روزنې لپاره د اړینو وسایلو او موادو یوه کڅوړه ورکړل شوې ده.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، یادو ۲۰ تنو نیالګیو روزونکو ته د ډاکار مؤسسې له لوري د نیالګیو د روزنې په برخه کې څلور میاشتې مسلکي روزنه ورکړل شوې، چې له بشپړولو وروسته ورته د خپلو نرسریو د فعالیتونو د پیل او پراختیا په موخه اړین وسایل او مواد برابر شول.
نوموړي زیاته کړه، چې هرې نرسري ته د ۳۶ قلمه اړینو وسایلو او موادو یوه کڅوړه وېشل شوې، چې د نیالګیو د روزنې وسایل، کیمیاوي سرې، تخمونه، درمل او یو شمېر نور اړین توکي پکې شامل دي.
د ننګرهار دکرنې رییس څرګنده کړه، چې د دغو نرسریو د جوړولو، نیالګیو روزونکو ته د مسلکي روزنې ورکولو او د اړینو وسایلو او موادو د برابرولو اساسي موخه د معیاري او سالمو نیالګیو تولید، د شنو ساحو پراختیا، د بڼوالۍ سکټور وده او د سیمې خلکو ته د دوامدارو کاري فرصتونو برابرول دي.
د نوموړي په وینا، د دغې مرستې په پلي کېدو سره به په ننګرهار کې د معیاري نیالګیو د تولید ظرفیت لا لوړ شي او بزګرانو او بڼوالو ته به د باکیفیته او سالمو نیالګیو د برابرولو زمینه لا پراخه شي.
همداراز تمه ده، چې د یادو نرسریو فعالیتونه د نیالګیو د تولید ترڅنګ، د بڼوالۍ د پراختیا، د شنو ساحو د زیاتوالي او د خلکو د اقتصادي پیاوړتیا په برخه کې هم اغېزمن تمام شي.