د کرنې وزارت د پلان او پروګرامونو د همغږۍ لوی ریاست نوی رییس معرفي شو
۲۸ چنګاښ ۱۴۰۵ هـ.ش
۴ صَفَر المُظَفَّر ۱۴۴۸ هـ.ق
مولوي عبدالعلي عمري د افغانستان اسلامي امارت د کرنې، اوبو لګولو او مالدارۍ وزارت د وړاندیز او د اسلامي امارت د ریاستالوزراء د عالي مقام د منظورۍ پر بنسټ، د دغه وزارت د پلان او پروګرامونو د همغږۍ د لوی رییس په توګه وټاکل شو او د یوې ځانګړې غونډې په ترڅ کې د یاد ریاست کارکوونکو ته وروپېژندل شو.
د نوموړي د معرفۍ مراسم د کرنې وزارت د پلان او پروګرامونو د همغږۍ د لوی ریاست په تالار کې د کرنې وزارت د مالي او اداري مرستیال مولوي نورالدین عمیر، د مرکزي ریاستونو د یو شمېر رییسانو او د یاد ریاست د کارکوونکو په حضور کې ترسره شول.
مولوي نورالدین عمیر په دې مراسمو کې د اداري سلسلې د مراعاتولو، د همغږۍ د پیاوړتیا او د افغانستان اسلامي امارت د نظام د اصولو په چوکاټ کې د مسؤلیتونو د ترسره کولو پر اهمیت ټینګار وکړ. نوموړي د کرنې وزارت د پلان او پروګرامونو د همغږۍ د پخواني لوی رییس مولوي عبدالغفور د خدمتونو او کړنو ستاینه وکړه او مولوي عبدالعلي عمري ته یې په نوې دنده کې د بریالیتوب هیله څرګنده کړه.
په دغو مراسمو کې مولوي عبدالعلي عمري هم د اسلامي امارت د مشرتابه او د کرنې وزارت له باور څخه مننه وکړه او ډاډ یې ورکړ چې د مسؤلینو او کارکوونکو په همکارۍ به د کرنې وزارت د پلان جوړونې، همغږۍ او د پروګرامونو د اغېزمن پرمختګ لپاره هلې ځلې وکړي.
د یادونې وړ ده، چې مولوي عبدالغفور په دې وروستیو کې د کرنې وزارت د معلوماتي ټکنالوژۍ د رییس په توګه ټاکل شوی دی. همدارنګه مولوي عبدالعلي عمري تر دې وړاندې د کرنې وزارت د استملاک او بیا مېشتېدو د لوی رییس په توګه دنده ترسره کوله.
