د ولایتي پلاوي په ملتیا ولسوالیو ته د غزني د کرنې ریاست مشرتابه سفر؛ د کرنیزو ستونزو د حل او پراختیایي پروژو پر چټکتیا ټینګار وشو
۱۱ چنګاښ ۱۴۰۵ هـ.ش
۱۶ مُحَرَّمُ الحَرام ۱۴۴۸ه.ق
د غزني ولایت د کرنې، اوبولګولو او مالدارۍ ریاست رییس د غزني ولایت د والي ولي جان حمزه په مشرۍ د ولایتي پلاوي په ترکیب د ناور، اجرستان، مالستان، جاغوري، ګیلان، ناوې، مقر او آببند ولسوالیو ته رسمي کاري سفر ترسره کړ، چې موخه یې د کرنې، اوبولګولو او مالدارۍ سکټور د وضعیت ارزونه، د پراختیایي پروژو څارنه او د بزګرانو او مالدارانو ستونزو ته له نږدې رسېدنه وه.
د دغه سفر په ترڅ کې ولایتي پلاوي د یادو ولسوالیو له ولسوالانو، د کرنې مدیریتونو، قومي مشرانو، دیني عالمانو، بزګرانو، مالدارانو او د سیمو له مخورو سره جلا جلا غونډې وکړې. په دغو غونډو کې د اوبو کمښت، د اوبولګولو شبکو پراختیا، د اصلاح شویو تخمونو او کیمیاوي سرو وېش، د نباتي ناروغیو او افتونو مخنیوی، د بڼوالۍ وده، د مالدارۍ خدمتونو پراختیا، د وترنري خدمتونو پیاوړتیا او د کرنیزو پروژو د اغېزمن تطبیق په اړه هر اړخیزې خبرې وشوې.
د غزني د کرنې، اوبولګولو او مالدارۍ رییس د بزګرانو او مالدارانو ستونزې، اړتیاوې او وړاندیزونه واورېدل او ډاډ یې ورکړ چې د کرنې، اوبولګولو او مالدارۍ وزارت د پالیسۍ او شته امکاناتو په چوکاټ کې به د یادو ولسوالیو لومړیتوبونو ته ځانګړې پاملرنه وشي. نوموړي ټینګار وکړ، چې د کرنیزو حاصلاتو د زیاتوالي، د اوبو د اغېزمن مدیریت، د کرنیزو خدمتونو د پراختیا او د دوامدارې کرنې د پیاوړتیا لپاره به عملي او اغېزمن اقدامات ترسره شي.
ورسره، ولایتي پلاوي د روانو پراختیایي پروژو له تطبیق څخه هم لیدنه وکړه، د اړوندو ادارو کړنې یې وارزولې او د چارو د لا ښه تنظیم، شفافیت او چټکتیا په موخه یې مسؤلینو ته لازمې سپارښتنې وکړې.
د سفر په پای کې د غزني د کرنې، اوبولګولو او مالدارۍ ریاست مشرتابه د سیمې له خلکو څخه د همکارۍ او رغنده وړاندیزونو له امله مننه وکړه او ویې ویل، چې له ولس سره مستقیمه اړیکه، پر وخت میداني ارزونې او د خلکو ستونزو ته رسېدنه د اغېزمنو دولتي خدمتونو د وړاندې کولو اساسي بنسټ جوړوي. همدارنګه ډاډ ورکړل شو، چې د دغه سفر موندنې او وړاندیزونه به د راتلونکو پرمختیایي پلانونو او پروژو د ترتیب او پلي کېدو پر مهال په جدي توګه په پام کې ونیول شي.
د کرنې، اوبولګولو او مالدارۍ وزارت د کرنیزو خدمتونو د اغېزمنتیا، د بزګرانو او مالدارانو د ستونزو د حل او د پراختیایي پروژو د کیفیت د ښه والي په موخه په بېلابېلو ولایتونو کې د میداني ارزونو، ولایتي سفرونو او له خلکو سره د مخامخ لیدنو لړۍ دوامداره ساتلې، څو د اړتیاوو پر بنسټ د کرنې او مالدارۍ سکټور لا پیاوړی او د هېواد د خوړو خوندیتوب او اقتصادي ودې ته زمینه برابره شي.
