هلمند کې د انګورو بڼوالو ته بڼوالۍ توکي ووېشل شول او د چرګوړو ایستلو فابریکه فعاله شوه

۲ مرغومې ۱۴۰۴ه‍.ش
۲ رَجَب المُرَجَّب ۱۴۴۷ه‍.ق
د هلمند ولایت د کرنې، اوبولګولو او مالدارۍ ریاست له لوري، په سنګین ولسوالی کې د همکارې موسسې په ملاتړ بڼوالۍ توکي ووېشل شول او همدارنګه د بولان د مالدارۍ په فارم کې د چرګوړو ایستلو فابریکه فعاله شوه، چې موخه یې د بڼوالۍ او مالدارۍ پیاوړتیا او د کورني تولید ملاتړ دی.
د هلمند ولایت د کرنې، اوبولګولو او مالدارۍ ریاست په همغږۍ، د سنګین ولسوالۍ کې د «آر او پپ» موسسې له لوري یو شمېر د انګورو بڼوالو ته د بڼوالۍ اړین توکي ووېشل شول. دغه توکي د سنګین ولسوالی د کرنې مسؤول په حضور کې مستحقو بڼوالو ته ووېشل شول، چې موخه یې د انګورو بڼونو پیاوړتیا، د حاصلاتو زیاتوالی او د بڼوالو اقتصادي ملاتړ دی.
په وېشل شویو توکو کې سپین انبار، پوتاشمي انبار، برقي دواپاش، چونه او سلفر پودر شامل وو، چې د بڼوالۍ د ښه مدیریت، د نباتاتو د مناسبې تغذیې او د ناروغیو او افتونو د مخنیوي لپاره مهم بلل کېږي. بڼوالو د یادو کیټونو له ترلاسه کولو خوښي څرګنده کړه او دا یې د خپلو بڼونو لپاره پر وخت او ګټوره مرسته وبلله.
په همدې حال کې د هلمند ولایت د کرنې، اوبولګولو او مالدارۍ ریاست له لوري د بولان د مالدارۍ په فارم کې د چرګوړو د ایستلو فابریکه د پانګونې په موخه خصوصي سکتور ته سپارل شوې، چې دا مهال فعاله ده او په تولید یې پیل کړی دی. د مالدارۍ او حیواني روغتیا آمریت د معلوماتو له مخې، د یادې فابریکې له لوري ۲۵ زره چرګوړي د هلمند فارم لرونکو ته ووېشل شول، څو یې وروزي او وروسته یې بازار ته وړاندې کړي.
د معلوماتو له مخې، دغه فابریکه په میاشت کې د ۲۵۰ زره چرګوړو د ایستلو ظرفیت لري او ټاکل شوې ده، چې په نږدې ورځو کې نور چرګوړي هم فارم لرونکو ته په واک کې ورکړل شي، تر څو د نورو هېوادونو د بې‌کیفیته وارداتو مخه ونیول شي او کورني تولیدات لا پیاوړي شي.