ننګرهار کې د شنو سیمو پراختیا په موخه د همغږۍ او په غریزو سیمو کې د نیالګیو پر کېنولو پریکړه وشوه
۲۴ لیندۍ ۱۴۰۴ هـ.ش
۲۴ جُمَادَى الثاني ۱۴۴۷ هـ.ق
د ننګرهار د کرنې، اوبو لګولو او مالدارۍ رییس مولوي محمد ولي محسن د خپل کار په دفتر کې د ننګرهار د چاپېریال ساتنې رییس، قاري احسانالله مختار او د رها مؤسسې د پروژې له مدیر سره د را روان پسرلني موسم لپاره د شپږ زره مثمر او غیر مثمر نیالګیو د کېنولو او د مناسب ځایونو د انتخاب په موخه ګډه ناسته ترسره کړه.
په دې ناسته کې د رها مؤسسې د پروژې مدیر انجنير فیروز محمد زئي وویل، چې یادې مؤسسې د راتلونکي پسرلني موسم لپاره پلان لري، څو په ننګرهار ولایت کې شپږ زره مثمر او غیر مثمر نیالګي کېنوي او نباتي تخمونه ووېشي. نوموړي زیاته کړه، چې د دې پروژې له مخې به ۸۰ سلنه ځنګلي او ۲۰ سلنه مېوه لرونکي نیالګي کېنول شي. همدارنګه، ۹۰ کسانو ته به د بڼوالۍ په برخه کې مسلکي روزنیز ټرېنینګونه هم ورکړل شي.
په یاده ناسته کې د ننګرهار د کرنې، اوبو لګولو او مالدارۍ رییس مولوي محمد ولي محسن د یاد نوښت هرکلی وکړ او ویې ویل، چې د غرونو او رغونو ابادول د ولسونو د عاید د زیاتوالي لپاره زمینه برابروي. نوموړي زیاته کړه چې عامالمنفعه ځایونه د ولس په ملتيا ښه ساتل کېږي او ټینګار یې وکړ چې هېواد به د ولس سره په ګډه ساتو، ځکه د عامه منفعې ځایونو ساتنه د ولس ګډ مسوولیت دی.
هغه همدارنګه ټینګار وکړ چې په غرنیو سیمو کې باید د هماغه سیمې له اقلیم او چاپېریال سره سم مناسب بوټي کېنول شي، ځکه د غرونو ابادول کولی شي د ولس لپاره د دوامدار عاید زمینه هم برابره کړي.
د ننګرهار د چاپېریال ساتنې رییس، قاري احسانالله مختار، ټینګار وکړ چې د نیالګیو کېنول باید د خاورې، اوبو او هوا له وضعیت سره سم ترسره شي او ورسره د عامه پوهاوي پروګرامونه پلي شي، تر څو خلک د طبیعي ځنګلونو د پراختیا او ساتنې په برخه کې فعاله ونډه واخلي.
د ناستې په پای کې د خاورې، هوا او اوبو شرایطو ته په کتو سره د نیالګیو د کېنولو، ساتنې او مراقبت لپاره مناسب ځایونه وټاکل شول.
