د هلمند د بولان څېړنیز فارم کې د تخمونو د تصدیق او غنمو د تجربوي کر پراخې پروژې پيل او بشپړې شوې
۲۰ لیندۍ ۱۴۰۴ هـ.ش
۲۰ جُمَادَى الثاني ۱۴۴۷ هـ.ق
د هلمند ولایت د کرنې ریاست د سهیل لوېدیځ زون د تخمونو د تصدیق امریت کارکوونکو د بولان څېړنیز فارم کې ۵۳۰ نمونې وکرلې، او هممهاله د غنمو د هستوي او مورني تخمونو د تولید لوی پلان په بریالیتوب بشپړ شو، چې موخه یې د تخمونو د کیفیت لوړول او د کرنیزو حاصلاتو پیاوړتیا ده.
د هلمند ولایت د کرنې، اوبولګولو او مالدارۍ ریاست اړوند د سهیل لوېدیځ زون د تخمونو د تصدیق امریت کارکوونکو د بولان په څېړنیز فارم کې په یوه جریب ځمکه کې د ننداریزې قطعې په چوکاټ کې د ۵۳۰ تخمیزو نمونو د کرلو عملي چارې پیل کړې. دغه ازمایښتي کښت د کرنیزو ډولونو د تشخیص، د نباتي ناروغیو د پیژندنې او د هغوی د مخنیوي په برخه کې مهم رول لري او د تخمونو د کیفیت او کرنیزو حاصلاتو د ښه والي لپاره اغېزمن ګام بلل کېږي.
د ازمایښتي کرې پایلې او موندنې به په منظم ډول د ریاست له رهبري او د کرنې وزارت سره شریکېږي، څو د کرنیز سکتور د لا پیاوړتیا لپاره ترې اغېزمنه استفاده وشي.
له بلې خوا، د بولان په څېړنیز فارم کې د غنمو د تجربوي کر، هستوي او مورني تخمونو د تولید پراخه پروژه هم په بریالیتوب سره بشپړه شوې ده. یاد پلان چې په ۳۴ جریبه ځمکه کې عملي شوی، د غنمو د اصلاح، اګرانومي او ناروغیو اړوند بېلابېل تجربې پکې ترسره شوې. سربېره پر دې، د سبو، صنعتي او لیګومي نباتاتو لپاره هم مطالعاتي قطعات جوړ شوي دي.
په دغه فارم کې د غنمو ۱۰ ډول هستوي تخمونه او ۱۱ ورايټۍ مورني تخمونه کرل شوي، او د مورني تخم د تولید لپاره ۱۷.۳ مټریک ټنه تولیدي پلان په بریالیتوب سره تطبیق شوی. همدارنګه، د پیازو د تخم د تولید لپاره د پیازو کلچې هم کرل شوې دي.
ټولې یادې پروژې د کرنې، اوبولګولو او مالدارۍ وزارت د څېړنو لوی ریاست د پلان له مخې ترسره شوي او د هلمند د کرنیزو څېړنو د پیاوړتیا لپاره یو مهم پرمختګ بلل کېږي.
