لغمان کې د کانګو وینهبهېدونکې تبې د مخنیوي کمپاین او د بروسلوز ناروغۍ د څار پروګرامونو د تطبیق پرانیسته وشوه
۵ لیندۍ ۱۴۰۴ هـ.ش
۵ جُمَادَى الثانی ۱۴۴۷ هـ.ق
د لغمان په ولایت کې د کرنې، اوبو لګولو او مالدارۍ ریاست د پراختیایي بودیجې له مخې د کانګو وینهبهېدونکې تبې د مخنیوي کمپاین او د بروسلوز ناروغۍ د څار (سرولانس) او نمونه اخیستلو پروګرامونو لړۍ رسماً پیل شوه. د یادو پروګرامونو پرانیسته د لغمان د کرنې رییس مولوي عبدالستار محمد وکړه، او اړین درمل او وسایل د خصوصي سکتور وترنر ډاکترانو ته وسپارل شول.
مولوي عبدالستار محمد وویل، چې دغه پروګرامونه به د مرکز مهترلام په ګډون د ټولو ولسوالیو په کچه عملي کېږي، چې په ترڅ کې به زرګونه څاروي، غوجلې او د څارویو پېر–پلور ځایونه دواپاشي شي.
نوموړي زیاته کړه، چې د پروګرام پلي کېدل به د سیمهییزو وترنر ډاکترانو په مرسته ترسره کېږي. ډاکترانو ته د کانګو تبې ضد درمل، دواپاشي پمپونه او د حفظالصحې اړوند وسایل ورکول شوي، څو وکولای شي د ناروغیو د خپرېدو مخه ونیسي.
کانګو تبه یوه خطرناکه وېروسي ناروغي ده، چې د کنو له لارې د څارویو او انسانانو ترمنځ انتقالېږي. د انسانانو د خوندیتوب او د ناروغیو د پراخېدو د مخنیوي لپاره دا ډول کمپاینونه ډېر اغېزمن بلل کېږي.
د یادولو وړ ده، چې دغه ډول پروګرامونه هر کال د کرنې وزارت د پراختیایي فعالیتونو په چوکاټ کې په ټوله هیواد کې عملي کېږي.
