کندهار کې د څارویو د قاچاقي درملو د مخنیوي په پار هڅې
۲۱ تله ۱۴۰۴ هـ.ش
۲۰ رَبِیعُ الْثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د مالدارۍ آمریت په کندهار ښار کې د څارویو درملو پلورنځیو او لویو شرکتونو څخه د بېکیفیته، تر وختتېرو او قاچاقي درملو د مخنیوي په موخه یو ورځنی پراخ کمپاین ترسره کړ.
د کندهار دکرنې ریاست د مالدارۍ آمریت عمومي مدیر ډاکټر توریالي قیام وایي؛ چې دغه کمپاین د مالدارۍ آمر حافظ حمیدالله په مشرۍ ترسره شوه. د کمپاین پر مهال د کندهار ښار د څارویو درملو بازارونو، پلورنځیو او شرکتونو څخه مفصله څارنه وشوه، ترڅو د غیرقانوني او بېکیفیته درملو د پلور مخه ونیول شي.
نوموړي زیاته کړه، چې د کمپاین پر مهال د درمل پلورنځیو او لوی شرکتونو مسؤلینو خپلې شته ستونزې هم د مالدارۍ آمر سره شریکې کړې چې راتلونکي نږدې څو ورځو کې به د ریاست مقام سره شریکي او د مسؤلینو سره یوځای به قانوني حلاري ورته ولټول شي.
د یادونې وړ ده، چې د کندهار د کرنې او مالدارۍ ریاست دمالدارۍ آمریت تر دې مخکې هم ورته څارنیز کمپاینونه ترسره کړي دي، چې د هغو پر مهال سلګونه بوتله بېکیفیته او تر وختتېري درمل راټول او له بازار څخه ایستل شوي دي.
