۲۶ لېندۍ ۱۳۹۸
د کندهار د کرنې، اوبولګولو او مالدارۍ ریاست له خوا ددې ولایت پر یوشمېر بزګرو د مېوو او سبو وچوونکي توکي وېشل شوي دي. دغه توکي د «M.C» موسسې په همکارۍ پر دغو بزګرانو وېشل شوي دي.
د دغو توکو وېش څخه موخه د کرنیزو محصولاتو بیې لوړول، د خلکو لپاره کاري زمینې برابرول او د بېوزلو او بې سرپرستو کورنیو اقتصادي پیاوړتیا ده.
په هغه غونډه کې چې، ددغو توکو د وېش په پار جوړه شوې وه د کندهار ولایت دکرنې، اوبولګولو او مالدارۍ ریاست چارواکي وویل، چې مېوه او سابه تر حاصل وروسته په ډېره ټېټه بیه په بازار کې پلورل کیږي او یا هم خوڅاکیږي. دوی وویل چې، تر دې وروسته به له دې پروژې څخه برخمن شوي بزګران و کولای شي چې، د دغو وچوونکو توکو په واسطه مېوه او سابه وچ او پروسس کړي او حتا کولای شي چې، د ژمي په موسم کې هم ورڅخه ګټه پورته کړي.
باید وویل شي کوم بزګران چې دغه توکي یې ترلاسه کړي دي له توکو څخه د ښه ګټې اخیستنې په موخه روزل شوي هم دي.