د جلغوزیو محصول راټولولو په پار شېرزادو ولسوالی ته د ننګرهار دکرنې ریاست د پلاوي سفر
۱ زمری ۱۴۰۴ ه.ش
۲۷ مُحَرَّمُ الحَرام ۱۴۴۷ه.ق
د ننګرهار د کرنې، اوبو لګولو او مالدارۍ ریاست په لارښوونه د قدرتي زېرمو امر قاري کاهون عبدالرحمن اتل په مشرۍ ګډ پلاوي دجلغوزیو د۱۰ سلنه محصول راټولولو او د قدرتي ځنګلونو ساتلو په موخه شېرزاد ولسوالی ته سفر وکړ.
ښاغلي اتل د شېرزاد ولسوال، امنیه قومنان، د ترویج مدیرانو او څارنیزو کمیټو مسؤلینو سره د جلغوزیو د مالیې ترڅنګ د ځنګلونو ساتلو، جلغوزیو په فني شکل راټولولو، د ځنګلو د پریکولو مخنیوي او د ځنګلو د بیا رغولو په موخه ناسته ترسره کړه.
په یادې ولسوالی کې د ځایي مسؤلینو او څارنې کمیټو له لورې د ځنګلو د ساتلو او پالنې په برخه کې د همکارۍ او همغږۍ ډاډ ورکړل شو.
د ننګرهار په یوولسو ولسوالیو کې قدرتي ځنګلونه شتون لري؛ چې د سیمي د ښکلا ترڅنګ یي د اقلیم بدلون په برخه کې مثبت رول لوبولي دي.
