خوست کې یوشمېر بزګرانو ته شنې خونې جوړېږي

۱۶ چنګاښ ۱۴۰۴ ه‍.ش
۱۱ مُحَرَّمُ الحَرام ۱۴۴۷ه‍.ق
د خوست دکرنې، اوبولګولو او مالدارۍ ریاست چارواکي وایي، د ملګرو ملتونو د پراختیایي ادارې په همکارۍ په دې ولایت کې د موسمي سبو د کرکیلي دودولو او د بزګرانو د ملاتړ په پار ۲۱ شنې خونې جوړېږي.
د خوست دکرنې ریاست چارواکي وایي، چې دغه شنې خونې د وېژن سپلای شرکت په تخنیکي همکارۍ د خوست ولایت په مرکز کې جوړېږي، چې د جوړولو په پآر یې پر ۲۱ بزګرانو د شنوخونو اړوند توکي د چارواکو په شتون  کې ووېشل شول.
دا پروسه د خوست د کرنې رییس الحاج مولوي شېرمحمد ذبیح، د کرنیزو چارو آمر مولوي اسلم خان منیب، د وزارت د مقام د نظارت او ارزونې ټیم غړو، د پلان او برنامو مدیر اجمل قاسمي، د مېوو متخصص حضرت ولي حضرت یار او د یاد ریاست د سلاکار او متخصص بهیرګل صابري په حضور کې ترسره شوه.
د شنو خونو د جوړولو وسایل، له تخنیکي معیارونو سره سم، د وېژن سپلان شرکت له خوا برابر شوي، چې موخه یې د سبو او مېوو تولید زیاتوالی او د کرنیزو محصولاتو بازار ته اسانه لاس‌رسی دی.
د وېژن سپلای شرکت مسؤلینو ته هدایت ورکړل شو چې د دغو شنو خونو په جوړولو کې د موجودو نیمګړتیاوو اصلاح، د لوړ کیفیت مراعت، او د معیاري ودانیو جوړولو ته جدي پاملرنه وکړي.
یاد پروګرام د کروندګرو د عوایدو لوړولو او د خوست ولایت د کرنیزو خدمتونو د پراختیا په برخه کې یو مهم ګام ګڼل کېږي. دغه شنې خونې په ټولو موسمونو کې سابه او ترکاریو ته دخوست د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې جوړېږي.

.