د کندهار ولایت د کرنې ریاست نوی رییس معرفي شو
۳ چنګاښ ۱۴۰۴ ه.ش
۲۷ ذُو الحِجَّةِ ۱۴۴۶ه.ق
د افغانستان اسلامي امارت زعیم عالیقدر امیرالمؤمنین شیخ هبتالله حفظه الله تعالی ورعاه د حکم له مخې، الحاج مولوي عبدالرشید منیب د کندهار د کرنې، اوبو لګولو او مالدارۍ ریاست ته د نوي رییس په توګه معرفی شو.
د معرفی مراسم د دې ریاست د غونډو په تالار کې د کندهار ولایت مرستیال والي الحاج ملا محمد صادق انقلابي، د کندهار د کرنې ریاست مخکني رییس الحاج مولوي فضل الباري فضلي، نوی رییس الحاج مولوي عبدالرشید منیب، د کندهار یو شمېر د لوړپوړو چارواکو، د کرنې ریاست آمرینو، مدیرانو او ګڼ شمېر کارکوونکو په حضور کې ترسره شو. په دغو مراسمو کې، د نوي رییس د ګمارنې حکم د کرنې وزارت د استازي له خوا ولوستل شو.
د کندهار دکرنې نوی رییس الحاج مولوي عبدالرشید منیب د اسلامي امارت د مشرتابه له احکامو یې د اطاعت ژمنه وکړه، د خلکو خدمت ته یې ژمنتیا څرګنده کړه، او د ریاست له کارکوونکو یې د ملاتړ مننه وکړه.
هغه زیاته کړه: «موږ هر وخت د عالیقدر امیرالمؤمنین شیخ صاحب حفظه الله تعالی حکم ته لبیک وایو او ژمنه کوو، چې د کرنې ریاست د لا پیاوړتیا او خدمت لپاره به له بشپړ اخلاص سره کار وکړم.» نوموړي د پخواني رییس قدرداني وکړه او هغه یې یو تجربهکار او بریالی شخصیت یاد کړ.
د غونډې په پای کې، د کندهار د کرنې ریاست پخوانی رییس الحاج مولوي فضل الباري فضلي د نوي رییس ټاکنه پرځای او غوره پرېکړه وبلله او نوموړي ته یې د بشپړې همکارۍ ډاډ ورکړ. هغه وویل: «تبدیل او بدلون د نظام یو اصل دی، او موږ تل د خپل امیرالمؤمنین شیخ صاحب حفظه الله تعالی د حکم او آمر تابع یو.» ښاغلی فضلي له ټولو کارکوونکو مننه وکړه او له هغوی یې وغوښتل، چې له نوي رییس سره په اخلاص، صداقت او رښتینولۍ کار ته دوام ورکړي.
