ننګرهار کې بېوزله بزګرانو او مالدارانو سره د څه باندې درې میلیونه افغانیو نغدې مرسته وشوه
۱۲ مرغومې ۱۴۰۳ه.ش
۱ رَجَب المُرَجَّب ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ دافغانستان د کلیو بیا ودانولو مؤسسې(آر،آر،اې،اې) په تخنیکي او د کورډیډ په مالي همکارۍ ددې ولایت یوشمېر بېوزله بزګرانو او مالدارانو سره د درې میلیونه او ۱۷۵ زره افغانیو نغدې مرسته وشوه.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د ننګرهار په اچین، نازیان او بټي کوټ ولسوالېو کې ۲۵۲ هغو بېوزله او ناچاره بزګرانو او مالدارانو ته چې ځمکې یې کمه او د ګټې وټې بل مدرک ونلري مرسته وشوه.
ښاغلي محسن زیاته کړه، چې ددې مرستې په ترڅ کې هر بزګر سره ۱۲ زره او ۶۰۰ افغانۍ نغدې مرسته وشوه.
د افغانستان دکلیو بیا ودانولو ادارې مسؤل حاجي فضل الرحمن وویل، چې د یادو پیسو د وېش موخه د بزګرانو لاسنېوی او د خوړو خوندیتوب رامنځته کول دي.
نوموړي وویل، چې په راتلوونکي به نورو بېوزله کورنیو سره هم مرسته ترسره کړي.
