د خوست د کرنې ریاست په مشرۍ د سکتوري ادارو او مووسسو غونډه جوړه شوه

خوست ولایت د کرنې، اوبو لګولو او مالدارۍ ریاست تر مشرۍ لاندې د سکتوري ادارو او غیر دولتي مووسسو تر منځ د ۱۴۰۳ کال اوومه سکتوري غونډه وشوه.
دغه غونډه د کرنې ریاست د غونډو په تالار کې ترسره شوه، چې پکې د سکتوري ادارو مسوولینو، آمرینو او د مووسسو استازو ګډون کړی و. غونډه د عشر او زکات عوایدو د تنظیم او محاسبې آمر، قاري سید مرجان خالد لخوا د قرآن کریم د څو مبارکو آیتونو په تلاوت سره پیل شوه.
ورپسې د کرنې، اوبو لګولو او مالدارۍ ریاست سرپرست، مولوي اظهارالدین ابوناصر، ګډونوالو ته ښه راغلاست ووایه. هغه د تیرې سکتوري غونډې پرېکړو او اجراآتو باندې خبرې وکړې او له مووسسو یې مننه وکړه چې د سکتوري ادارو غوښتنو ته په پام یې اوږدمهاله پروژو ته په خپلو پلانونو کې ځای ورکړی او ځینې یې عملاً پیل کړي دي.
مولوي ابوناصر ټینګار وکړ: چې د پروژو د بریالي تطبیق لپاره باید د پروژې او د ساحې په انتخاب کې له سکتوري ادارو سره مخکې له مخکې همغږي وشي. هغه زیاته کړه چې د اړتیاوو پر بنسټ او په صداقت سره د کارونو ترسره کول د ښې همغږۍ په وسیله شوني دي. چې د مووسسو استازو د همکارۍ ډاډ ورکړ.
د غونډې په ترڅ کې د کلیو پراختیا، مهاجرینو او چاپېریال ساتنې ریاستونو استازو پر خپل وخت د سپارل شوو فعالیتونو پر اجرا ټینګار وکړ او د مووسسو له کړنو یې رضایت وښود. او د کار د کیفیت د ښه والي په برخه کې یې اړینې سپارښتنې وکړې.
د کرنې ریاست سلاکار او متخصص بهیر ګل صابري، د مالدارۍ او څارویو د روغتیا آمر انعام الله جاوید، د طبیعي سرچینو آمر مولوي کمال الدین کمال او د کرنیزو چارو عمومي مدیر عبدالسلام همت یار هم خپل وړاندیزونه او نظرونه شریک کړل.
په غونډه کې د مووسسو استازو د خپلو کړنو راپورونه، وړاندیزونه او راتلونکي پلانونه وړاندې کړل، چې د ګډونوالو د توجه وړ وګرځېدل. همدارنګه د ۱۴۰۴ کال د پراختیایي پلان د ترتیبولو په اړه تفصیلي بحث وشو. پرېکړه وشوه چې اړوند آمریتونه دې د فارمټ مطابق اړینې پروژې ترتیب او پلان مدیریت ته وسپاري.
د او آر ډي مووسسې ولایتي مسؤل انجنیر پکتین د خپلو فعالیتونو په اړه تفصیلي پریزینټیشن وړاندې کړ، چې د ګډونوالو له لوري مثبت وارزول شو.
مولوي ابو ناصر غونډه ګټوره وبلله او ټینګار یې وکړ چې غیر حاضرې ادارې او موسسې دې په راتلونکو غونډو کې ګډون وکړي، او د دې موضوع د جدي تعقیب ډاډ یې ورکړ. غونډه د اسلامي نظام د دوام او د آباد افغانستان دعا په ویلو سره پای ته ورسېده.