د کرنې وزارت د ستراتیژیکو زېرمو رئیس هلمند والي سره وکتل
۳۰ لړم ۱۴۰۳ه.ش
۱۸ جُمَادَى الأول ۱۴۴۶ه.ق
د کرنې، اوبولګولو او مالدارۍ وزارت د ستراتیژیکو زېرمو رئیس مولوي قدرت الله حقیار د هلمند والي مولوي عبدالرحمن مسلم کندوزي سره وکتل. په دې لیدنه کې د هلمند ولایت کرنې، اوبولګولو او مالدارۍ رئیس مولوي نیازمحمد وهاج هم ګډون درلود.
د لیدنې پر مهال ښاغلي حقیار د هلمند مقام له خوا په دې ولایت کې د اضافي غنمو د پېرلو پروسه کې د ترسره شوو همکاریو ستاینه وکړه او په راتلونکي کې یې د لا زیاتو همکاریو غوښتنه وکړه. نوموړي د بزګرانو ملاتړ مهم وباله او ویې ویل چې د عالیقدر امیرالمؤمنین حفظه الله په ځانګړي حکم به د هېواد په کچه نږدې ۳۶ زره او ۳۰۰ متریک ټنه غنم د اړتیا په وخت کې د ولسونو لپاره چمتو وي. هغه د دې پروسې د بریالي تطبیق لپاره د ولایت مقام څخه د لا زیاتو همکاریو غوښتنه وکړه.
د کرنې ریاست رئیس مولوي وهاج د هلمند والي ته په یاده پروسه کې د ترسره شوو کړنو راپور وړاندې کړ. نوموړي وویل چې د کرنې وزارت په همکارۍ د هلمند ونډه زیاته شوې او په دې ولایت کې به ټولټال ۵ زره او ۸۶۸ متریک ټنه غنم د کړنلارې مطابق له بزګرانو، کوپراتیفونو، شرکتونو او علافانو څخه وپېرل شي. له دې جملې به ۱ زره او ۶۳۱ متریک ټنه په هلمند کې ځای پر ځای شي او ۴ زره او ۲۳۶ متریک ټنه به د کابل مرکزي سیلو ته واستول شي. نوموړي د ستراتیژیکو زېرمو د رئیس راتګ مؤثر وباله او ډاډ یې ورکړ چې دا پروسه به د وزارت د نوو لارښوونو مطابق لا منظم پر مخ یوړل شي.
د هلمند والي مولوي عبدالرحمن مسلم کندوزي د راغلي پلاوي هرکلی وکړ او د پروسې د بریالي تطبیق لپاره یې د بشپړې همکارۍ ډاډ ورکړ. نوموړي وویل چې د عالیقدر امیرالمؤمنین حفظه الله د مرحمت له مخې د هلمند بزګرانو سره د اضافي غنمو د پېرلو له لارې لویه اقتصادي مرسته کېږي. هغه د پروسې پر روڼتیا، د بزګرانو ستونزو هوارولو، او د مشرتابه حکم د عملي تطبیق په برخه کې د هر اړخیزو مسؤلانه همکاریو ژمنه وکړه.
