په کندهار دامان ولسوالۍ کې د تازه شیدو پروسس یو لوی مرکز پرانستل شو
۱۲ تله ۱۴۰۳ه.ش
۳۰ رَبِیعُ الْأَوَّل ۱۴۴۶ه.ق
د کندهار کرنې، اوبولګولو او مالدارۍ ریاست په همغږۍ او د میلکو کمپنۍ په مالي همکارۍ، د خوشهاب په سیمه کې د تازه شیدو پروسس لوی مرکز پرانیستل شو. دا مرکز د مالدارۍ سکتور د ودې، پراختیا، او د بېوزلو مالدارانو د ملاتړ لپاره جوړ شوی دی.
په دې غونډه کې د کرنې او مالدارۍ وزارت د کرنې او مالدارۍ مرستیال الحاج مولوي صدراغظم عثماني، د میلکو کمپنۍ استازي، د ولسوالۍ مخورو مشرانو او مالدارانو ګډون درلود.
د کرنې او مالدارۍ مرستیال الحاج مولوي صدراعظم عثماني د مالدارۍ سکتور ستونزو د حل، د مالدارانو د ملاتړ او تازه شیدو ته د بازار موندنې په برخو کې د مرستې ژمنه وکړه.
مالدارانو له کرنې ریاست او میلکو کمپنۍ څخه مننه وکړه او دا یې د مالدارۍ سکتور د پراختیا او پرمختګ لپاره یو مثبت ګام وباله. هغوی د مالدارۍ په برخه کې خپلې ستونزې او غوښتنې هم له مرستیال سره شریکې کړې.
یاد مرکز چې د ۱۰۰ زره ډالرو په ارزښت جوړ شوی، په ۲۴ ساعتونو کې د ۱۰ زره کیلو ګرامه شیدو پروسس کولو ظرفیت لري. د خوشهاب او دامان نورو سیمو ۷۰۰ مالداران به شیدې دې مرکز ته راوړي.
د کندهار کرنې او مالدارۍ ریاست په همغږۍ، میلکو کمپنۍ پلان لري چې په نږدې راتلونکې کې د کندهار په نورو ولسوالیو کې هم ورته مرکزونه د مالدارانو د ودې او ملاتړ لپاره پرانیزي.
